Як ҷавони 34-сола дар ноҳияи Бобоҷон Ғафуров бо гумони латукӯб ва куштори падари 67-солааш боздошт шудааст. Дар ин бора рӯзи 14-уми октябр Раёсати корҳои дохилии вилояти Суғд дар барномаи “Милитсия хабар медиҳад” иттилоъ додааст.

Ба гуфтаи манбаъ, ин падару писар сокинони ҷамоати Дадобой Холматови ноҳияи мазкур буда, ҳангоми мастӣ байнашон муноқиша сар задааст. Дар натиҷа, ба қавли пулиси Суғд, ҷавон падарашро бо корд мезанад, ки боис ба марги ӯ мешавад.

Мақомот гуфтаанд, гумонбаршуда барои пинҳон кардани кирдори худ ҷасади падарашро ба ҳавз партофтааст. Назари боздоштшуда дар робита ба ин гуфтаҳои пулиси Суғд ба расонаҳо маълум нест.

Ӯ дар гузориши мақомот тасдиқ мекунад, ки ин корро анҷом додааст, вале маълум нест, ин навор таҳти чӣ шароите сабт гардидааст.

Мақомот алайҳи боздоштшуда бо иттиҳоми “одамкушӣ” (моддаи 104 КҶ) парвандаи ҷиноӣ боз кардаанд. Бар асоси ин итиҳом, ба ӯ аз 15 соли зиндон то ҳабси абад ҷазо таҳдид мекунад.

Дар Тоҷикистон куштори наздикон аз сӯи хешовандонашон ҳодисаи нав нест. Қаблан низ чунин ҳодисаҳо расонаӣ шуда буд. Тибқи иттилои Вазорати корҳои дохилӣ дар кишвар дар шаш моҳи  соли равон 28 ҳолати одамкушӣ ва сӯйиқасд ба ҷон сабт шудааст.

Дар Telegram, Facebook ва Instagram бо мо бимонед.