Ҳаҷми сармоягузориҳои Русия ба Тоҷикистон коҳиш меёбанд ва ин сабабҳои худро дорад: меъёрҳои баланди андоз, бахусус дар соҳаи телекоммуникатсия. Андозҳо баъзан аз худи даромад зиёдтаранд, изҳор дошт сафири Русия дар Тоҷикистон Игор Лякин Фролов зимни нишасти хабарии рӯзи 27 декабр.

Дипломати рус изҳори умедворӣ намуд, ки дастурҳои дар паёми имсолаи президент зикршуда оид ба андешидани чораҳо барои беҳбуди муҳити сармоягузорӣ дар Тоҷикистон ба беҳтар шудани вазъ дар ин самт мусоидат мекунанд.

«Мо дарк мекунем, ки дар кишвар барои ин хоҳиш ҳаст, вале шароити дахлдор муҳайё кардан зарур аст, ин ҳақиқати баҳснопазир мебошад», - гуфт ӯ.

Сафир зикр кард, ки то ҳол мушкили пардохти маблағи барқи нерӯгоҳи «Сангтӯда-1» (80 млн. $) аз ҷониби ширкати «Барқи тоҷик» ҳалношуда боқӣ монда, «пешравие ҳам дар ин самт ба мушоҳида намерасад».

«Мисолҳои мусбат ҳам ҷой доранд. Имсол дар Душанбе маркази фитнеси «X-FIT» бо сармоягузории 10 млн. доллари ИМА, қаҳвахонаи «Шоколадница» низ бо сармоягузории Русия боз шуд. Ин сармоягузориҳои мустақим мебошанд, ки ба тарзи ҳаёти нав дар шаҳр мусоидат мекунанд», - гуфт Игор Лякин-Фролов.

Бино ба маълумоти дипломат, соли равон ҳаҷми сармоягузориҳои мустақим 80 млн. ва сармоягузориҳои умумӣ 1,5 млрд. доллари ИМА-ро ташкил дода, ҳаҷми савдо миёни Тоҷикистону Русия низ начандон кам шудааст: соли 2014 он 1250 млрд. ва соли 2016 беш аз 1 млрд. доллари  ИМА-ро ташкил додааст ва дар ҳамин ҳол, сохтори он тағйир наёфта, ҳудуди 90% ба содирот аз Русия рост меояд.

«Мо мефаҳмем, ки ин кам аст ва кӯшиш ба харҷ дода истодаем, ки ҳаҷми воридот аз Тоҷикистонро зиёд кунем, аз ҷумла ба воситаи барномаи маҳсулоти воридотивазкунанда», - зикр кард сафири Русия.

Лякин-Фролов ҳамчунин илова кард, ки ба маълумоти оморӣ оид ба ҳаҷми воридот аз Тоҷикистон маҳсулоте, ки тариқи Қирғизистону Қазоқистон ба Русия ворид мешавад, ба инобат гирифта нашудааст.