Сафоратҳои Британияи Кабир, Олмон, Фаронса, Иёлоти Муттаҳидаи Амрико ва Намояндагии Иттиҳоди Аврупо дар Ҷумҳурии Тоҷикистон оид ба мунтазам баста шудани сомонаҳои хабарӣ, аз ҷумла «Азия Плюс», «Радиои Озодӣ», ва инчунин шабакаҳои иҷтимоӣ изҳори нигаронӣ менамоянд.

“Мо боварӣ дорем, ки ҳуқуқи ҳар як шахс барои озодона баён намудани фикру ақидаи худ умумиҷаҳонӣ буда, аз истифодаи он дар майдони ҷамъиятӣ ва ё интернет вобастагӣ надорад”, - омадааст дар изҳороти нашршуда дар сомонаи сафорати ИМА дар ҶТ.

Сафоратҳо аз ҳукумати Тоҷикистон даъват кардаанд, ки озодии матбуотро дар асоси ӯҳдадориҳои байналмилалии Ҷумҳурии Тоҷикистон таҳти Паймони байналхалқӣ оид ба ҳуқуқҳои шаҳрвандӣ ва сиёсӣ таъмин намояд.

“Мо боварӣ дорем, ки пешрафти дарозмуддат, амният ва субот дар Тоҷикистон масъулияти пурраи ҳукуматро ҷиҳати ҳифзи озодии сухан, озодии васоити ахбори умум ва ҳуқуқи рӯзноманигорон барои бе тарсу сензура ва ё беҷазо кор карданро талаб менамояд”, - таъкид мешавад дар изҳорот.

Ғайр аз ин, қайд мешавад дар изҳорот, дастрасӣ ба интернети босуръат ва бо нархи дастрас барои рушди иқтисодии ҳар як кишвар бисёр муҳим аст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.