Тибқи маълумоти пешакии Комиссияи марказии интихобот ва раъйдиҳӣ (КМИР)-и Тоҷикистон, сарвари давлати амалкунандаи ҷумҳурӣ Эмомалӣ Раҳмон дар маъркаи интихоботи президентӣ ғолиб омад.

“Ба ҷонибдории Эмомалӣ Раҳмон 90,92% ё худ 3 миллиону 837 ҳазору 927 нафар раъйдиҳандагон овоз доданд”, - хабар дод раиси КМИР Тоҷикистон Худоёр Худоёрзода. Натиҷаҳои ниҳоиро Комиссия бояд дар муддати 10 рӯз аз замони интихобот эълон кунад.

Ба ин тариқ, президенти кунунӣ, ки аз соли 1992 сарвари давлати Тоҷикистон аст, бори панҷум пайдарпай президенти мамлакат интихоб шуд.

Номзади Ҳизби аграрӣ Рустам Латифзода 3,03%, ё худ 127 ҳазору 746 нафар, Ҳизби ислоҳоти иқтисодӣ Рустам Раҳматзода - 2,15% ё худ 90 ҳазору 587 нафар, Ҳизби сотсиалист Абдуҳалим Ғаффорзода - 1,49% ё худ 62 ҳазору 853 нафар ва Ҳизби коммунистӣ Мироҷ Абдуллоев –1,17 % ё худ 49 ҳазору 212 нафар овозҳои интихобкунандагонро ба даст оварданд.

Бино ба маълумоти пешакӣ, дар маъракаи интихоботи президентӣ 4,2 млн нафар шаҳрвандони кишвар иштирок карда, ҳузури интихобкунандагон 85,3%-ро ташкил дод.

Ҷараёни интихоботро нозирон аз ИДМ, СҲШ, СААД, САҲА, Думаи давлатӣ ва Шӯрои Федератсияи Русия пайгирӣ карданд. Дар рафти интихобот қонуншиканиҳо ба қайд гирифта нашудааст.

Дар ҳамин ҳол, то охири моҳи октябр ҳукумати Тоҷикистон бо ҳайати пурра истеъфо медиҳад. Мувофиқи меъёрҳои амалкунандаи қонуни конститутсионии Тоҷикистон “Дар бораи ҳукумат”, ҳукумати айни замон амалкунандаи ҷумҳурӣ назди президенти тозаинтихоб ваколатҳои худро месупорад.

Баъди маросими расман сари мансаб омадани президенти тозаинтихоби кишвар, ки то охири ҳамин моҳ доир мегардад, ҳукумат ба истеъфо меравад, хабар дод ба “Азия-Плюс” як манбаъ аз ҳукумати ҷумҳурӣ.

Ҳукумати Тоҷикистон аз сарвазир, муовини аввал ва муовинони ӯ, вазирон ва раисони Кумитаҳои давлатӣ иборат аст.

Қобили зикр аст, ки дар Тоҷикистон президент ҳамзамон раиси ҳукумати ҷумҳурӣ мебошад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.