Вазири маориф ва илми Тоҷикистон Нуриддин Саид зимни нишасти хабарӣ изҳор намуд, ки аз ҳисоби донишҷӯёне, ки бо маблағи буҷет таҳсил кардаву баъди хатми муассисаи таълимӣ бо роҳхат ба ҷойи кор ҳозир нашудаанд, 150 ҳазор сомонӣ ба буҷети давлат баргардонида шудааст.

Қобили зикр аст, ки мутобиқи қарори Вазорати маориф ва илми Тоҷикистон аз соли 2012, донишҷӯёни шуъбаи буҷетӣ зимни дохилшавӣ ва имзои қарордоди таҳсил уҳдадор мешаванд, ки баъди хатми таҳсил тибқи роҳхати муассиса се сол ҳатман кор мекунанд ва танҳо баъди он диплом мегиранд.

Нуриддин Саид қайд кард, ки Вазорати маориф танҳо ба назорати донишҷӯёни касби омӯзгорӣ дар ин масъала ҳуқуқ дорад ва соли 2015 мактабҳои олии кишварро бо чунин ихтисос 4 ҳазору 800 нафар омӯзгорони ҷавон хатм кардаанд.

«Ҳар нафаре бояд масъулияти шаҳрвандӣ дошта бошад. Шаҳрванд панҷ сол бо маблағи давлат таҳсил карда, вале баъди анҷоми таҳсил бо роҳхати муассиса ба ҷойи корӣ ҳозир намешавад. Аз ин рӯ, тасмим гирифта шуд, ки муассисаҳои таълимӣ барои рӯёнидани маблағи таҳсил аз чунин донишҷӯён ба судҳо муроҷиат кунанд, то ки ё маҷбуран ба кор раванд ва ё маблағи буҷетро баргардонанд», - гуфт вазир.

Дар хусуси ҳаҷми маблағи таҳсил, ки бояд донишҷӯён барои панҷ соли таҳсил баргардонанд, маълумот дода нашуд, вале тибқи маълумотҳои расида ба «Азия-Плюс», ин маблағ 8 ҳазор сомонииро ташкил медиҳад. Дар ҳамин ҳол, вазир саҳеҳан маълумот дод, ки то имрӯз аз ин ҳисоби чунин донишҷӯёни «беинсоф» 150 ҳазор сомонӣ ба буҷети давлат баргардонида шудааст.

Ҳамчунин зикр гардид, ки айни замон мактабҳои таҳсилоти умумии кишвар ба 240 нафар омӯзгорон ниёз доранд ва шумори умумии муаллимон 110 ҳазор нафарро ташкил медиҳад.

«Гуфтаниам, ки мушкилоти норасоии омӯзгорон қариб пурра ҳаллу фасл шуда, акнун мо бояд ба сифати таълим эътибор диҳем. Барои беҳбуди сифати таълим мо ба баргузор намудани санҷиши сатҳи тахассусӣ (аттестатсия)-и омӯзгорон шурӯъ мекунем», - афзуд Нуриддин Саид.