Агентии иттилотиву таҳлилии Content Review натиҷаҳои таҳқиқоти тарифҳоро ба хизматгузории интернети мобилӣ дар 50 кишвари дунё ба нашр расонид.

Дар ҷараёни баргузории таҳқиқот, ки дар ҳамдастӣ бо ширкати «Вымпелком» гузаронида шуд, пешниҳодоти тарифии 137 операторои алоқа мавриди таҳлил қарор гирифта, арзиши як гигабайти онҳо ҳисобу китоб шуд.

Интернети мобилии арзонтарин дар Эрон ба қайд гиифта шудааст, ки арзиши як гигабайт тақрибан 9 сенти амрикоиро ташкил медиҳад.

Барои ҳисобу китоби арзиши гигабайт меъёрҳои тарифӣ ё «интернет-тарифҳо»-и васлшуда аз 3 гигабайт ва зиёдтар аз он гирифта шудааст. Дар ҳар кадоме аз кишварҳо тарифҳои чор операторони бузург баррасӣ шуда, дар ҳисоби ниҳоӣ нишондиҳандаи миёнаи арзиши гигабайт истифода шудааст.

Ба даҳгонаи кишварҳо бо интернети мобилии арзон ба ҷуз Эрон, Полша (27 сент барои 1 Гигабайт), Венесуэла (37 сент), Қазоқистон (80 сент), Ҳиндустон (85 сент), Миср (88 сент), Покистон (90 сент), Русия (1,05 доллар), Италия (1,53 доллар) ва Нигерия (1,6 доллар) шомил гардидаанд.

---

Мутахассисони Content Review тарифҳо ба хизматрасонии интернети мобилиро дар Тоҷикистон таҳқиқ накардаанд.

Лекин, бо назардошти меъёрҳои тарифии мавриди истифода дар рейтинг - аз 3 гигабайт ва болотар аз он, арзиши 1 гигабайт интернети мобилии операторони Тоҷикистон ба ҳисоби миёна 26 сомонӣ ё худ наздики 3 долларро ташкил медиҳад.

Ҳамин тариқ, дар рейтинги Content Review Тоҷикистонро байни Финландия ва Тайван, ки арзиши интернети мобилӣ дар ин кишварҳо мутаносибан ба 2,9 ва 3,06 доллар баробар аст, метавон ба зинаи 17-ум гузошт.

Қобили зикр аст, ки мувофиқи ин рейтинг, интернети мобилии гаронтарин - 13,3 доллар барои як гигабайт дар Япония амал мекунад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.