Хадамоти алоқаи назди ҳукумати Тоҷикистон арзиши як симкорти ширкатҳои мобилии ҷумҳуриро дар ҳаҷми 250 сомонӣ (26 доллар) муқаррар кард.

Тавре ба «Азия-Плюс» аз ширкатҳои мобилии кишвар хабар доданд, акнун харидорӣ ё дубора бақайдгирии симкорт 26 доллар нарх хоҳад дошт. Шахсоне, ки рақами худро гум кардаанд, низ ҳамин миқдор маблағ пардохт мекунанд. Ин воситаҳои пулиро ширкатҳои мобилӣ бояд ба суратҳисоби Хадамоти алоқа гузаронанд.

Ташаббуси ҷорӣ кардани пардохт барои симкортҳо бо ин миқдор маблағ аз ҷониби Вазорати корҳои дохилӣ ба хотири таъмини ҳарчи бештари амният пешниҳод шуд. Яъне симкортҳои ширкатҳои мобилии Тоҷикистон дигар камтар ба дасти шахсони тасодуфӣ меафтанд. Агар дар пойгоҳи маълумоти ВКД рақами мушаххас сабт шавад, пас танҳо соҳиби симкорт ба он масъул хоҳад буд.

Қобили зикр аст, ки дар Тоҷикистон як муштарӣ танҳо ду симкорти як ширкати мобилиро дастрас карда метавонад. Агар шумори симкортҳои муштарӣ зиёд бошад, пас ӯ бояд ба маркази хизматгузории оператори худ муроҷиат намуда, кортро дубора ба номи шахсе ба қайд гузорад, ки аз он истифода мекунад. То 1 сентябр ин амалро бепул метавон анҷом дод.

Дар Тоҷикистон чор ширкати мобилӣ - Babilon-Mobile, Tcell, Megafon-Tajikistan, Beeline нисбатан фаъол мебошанд. Соли гузашта 6,1 млн. адад симкортҳо дубора бақайд гирифта шуданд. Як ширкати мобилӣ ҳамасола ба ҳисоби миёна 300 ҳазор симкорт мефурӯшад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.