Роҳбари Агентии давлатии ҳифзи иҷтимоии аҳолии Вазорати тандурустии Тоҷикистон Абдулҳаким Холзода аз ҳисоби воситаҳои шахсии худаш дар Кӯлоб бунгоҳи тиббӣ сохт.
Тавре ба “Азия-Плюс” аз Вазорати тандурустии ҷумҳурӣ дар ин робита хабар доданд, барои бунёд ва бо таҷҳизоти зарурӣ таъмин кардани ин нуқтаи тиббӣ беш аз 400 ҳазор сомонӣ воситаҳои пулӣ масраф шудааст.
Худи Абдулҳаким Холзода дар суҳбати кӯтоҳи телефонӣ дар мавриди ин масъала ба “Азия-Плюс” изҳор намуд, ки бунгоҳи тиббӣ “Моҳи тобон” номгузорӣ шуда, барои сохтмон ва таъмини он бо таҷҳизот воситаҳои шахсии ӯ ва бародаронаш истифода шудааст.
Тибқи маълумоти дарёфтӣ, то таъинот ба ин вазифа Абдулҳаким Холзода ба ҳайси тоҷири мувафақ дар соҳаи дорусозӣ фаъолият доштааст.
“Наздики чор сол пеш вақте ба ман вазифаи директори Агентии давлатии ҳифзи иҷтимоии аҳолиии Вазорати тандурустиро пешниҳод карданд, ман розӣ шудам”, - қайд кард Холзода.
Мутаассифона, акси ин бунгоҳи тиббиро бо чунин номи хушнавоз ӯ ба мо дастрас карда натавонист.
Қобили зикр аст, ки ин бори аввал нест, ки мансабдорони давлатии Тоҷикистон аз ҳисоби воситаҳои шахсии худ роҳҳоро таъмиру дигар иншооти таъиноти гуногун месозанд:
- Маркази тиббии муосир дар Балҷувон аз ҳисоби воситаҳои вазири мудофиаи Тоҷикистон;
- “Кӯли ҷавонон” дар пойтахт аз ҳисоби воситаҳои шахсии сарвазири мамлакат Қоҳир Расулзода;
- Боғи фарҳангу фароғати “Восеъ” дар ноҳияи Синои пойтахт аз ҳисоби воситаҳои муовини якуми сарвазири ҷумҳурӣ Давлаталӣ Саид. Ин боғ дар кӯчаи Муҳаммадиеви шаҳр воқеъ буда, майдони 4 гектарро фаро гирифтааст;
- Таъмир ва таҳкими заминаи моддӣ-техникии мактаби таҳсилоти умумии №5 шаҳри Хуҷанд аз ҳисоби воситаҳои раиси вилояти Суғд Раҷаббой Аҳмадзода;
- Боғи нави ба номи Алишери Навоӣ дар шаҳри Душанбе аз ҳисоӣи воситаҳои роҳбари Дастгоҳи иҷроияи Президенти кишвар Озода Раҳмон. Дар ин боғ мучассаи ду мутафаккири бузурги тоҷику ӯзбек Абдураҳмони Ҷомӣ ва Алишери Навоӣ қомат афрохтааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
Руcский