Раёсати Хадамоти муҳоҷират дар вилояти Суғд гуфтааст, ки дар 9 моҳи соли ҷорӣ 1143 нафар сокини ин вилоят аз ҳаққи вуруд ба Русия маҳрум шудаанд. Бино ба иттилои ин ниҳод, вуруди ин шаҳрвандон ба Русия “муваққатан манъ гардидааст”.

Соли ҷорӣ ба ин ниҳод 3 ҳазору 100 нафар муҳоҷир барои дақиқ кардани он ки ҳаққи сафар ба Русияро доранд ё не, муроҷиат кардаанд. Дар пайи санҷиши шиноснома ва муайян гардидани вазъи ҳуқуқӣ, дақиқ шудааст, ки сафари 1143 нафари онҳо ба Русия манъ карда шудааст.

Ин ниҳод гуфтааст, ки ба ин афрод бо муосидати Агентии меҳнат ва шуғли аҳолӣ барои ёфтани ҷойи кор ва омӯхтани касб ёрӣ кардааст. “Ба 83 нафар аз ин муҳоҷирон касб омўзонида, 350 нафар барои касбомўзӣ ҷалб шуданд. Инчунин 120 нафар бо ҷойи кори доимию мавсимӣ таъмин ва ба 56 нафар қарзи имтиёзнок дода шуд”,-омадааст дар хабарномаи раёсат.

Соли 2020 ба дунболи бемории ҳамагири коронавирус аксари кишварҳо аз ҷумла Русия низ дари худро ба рӯйи муҳоҷирон баст, ки маъмулан аксари хонаводаҳои тоҷик аз маблағи дарёфти муҳоҷирӣ вазъи иқтисодии худро беҳтар мекарданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.