Ширин Амонзода, вазири меҳнат, муҳоҷират ва шуғли аҳолии Тоҷикистон  бо нашри чанд аксе дар саҳфаи фейсбукаш гуфтааст, ки ба хабаргирии Раъно Насриддинова, барандаи Шоҳҷоизаи озмуни ҷумҳуриявии "Фурӯғи субҳи донӣ китоб аст" рафтааст. 

Ширин Амонзода навиштааст: "Дар ҳоле, ки аз дард лаб мегазад, аз китоб чеҳрааш пуртабассум мешукуфад. Раьно воқеан мубориз аст, дардро бо хониш саркӯб мекунад. Шифои оҷилу комил бароят, духтари хонову донои миллат!"

Раъно Насриддинова ҳафтаи гузашта дар беморхонаи шаҳри Панҷакент аз бемории кӯррӯда ҷарроҳӣ шуда буд. Наздиконаш вазъи сиҳатии ӯро хуб арзёбӣ мекунанд.

Вазир дар саҳфааш нагуфтааст, ки ба хабаргирии Раъно ба куҷо рафтааст. Зоҳиран ин аёдат дар Панҷакент сурат гирифтааст, зеро ҷарроҳии Насриддинова дар беморхонаи шаҳри Панҷакент гузашта буд. 

Дар озмуни соли 2020 "Фурӯғи субҳи доноӣ китоб аст" Раъно Насриддинова дурахшиши хубе дошт. Ӯ ҳам дар даври вилоятии озмун ва ҳам дар даври ҷумҳурявӣ барандаи Шоҳҷоизаи озмун шуд. 

Дар шабу рӯзи баргузории озмун гуфта мешуд, ки Эмомалӣ Раҳмон, президенти Тоҷикистон дар як ҷаласаи ҳукумат аз маҳорат ва истеъдоди Насриддинова ситоиш кардааст. 

Баъдан ҳузур ва суҳбати Раъно Насриддинова дар расонаҳо вокунишҳои гуногуне дар шабакаҳои иҷтимоӣ дошт. 

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.