Аз Ҷумҳурии Мардумии Чин ба Тоҷикистон рӯзи 7 ноябр 500 ҳазор воя ваксинаи «CoronaVac» ворид карда мешавад. Дар ин бора АМИТ “Ховар” бо истинод ба сардори Раёсати бехатарии эпидемиологӣ, ҳолатҳои фавқулодда ва ёрии таъҷилии Вазорати тандурустии ҷумҳурӣ Наврӯз Ҷаъфаров хабар медиҳад.

Гуфта мешавад, ваксинаи мазкур ба унвони кумаки башардӯстона ба Тоҷикистон ворид мегардад.

“То имрӯз дар чаҳорчӯби механизми ҷаҳонии дастрасии одилона ба ваксинаҳои Созмони ҷаҳонии тандурустӣ (COVAX) ва кумакҳои башардӯстонаи кишварҳои мададрасон ба Тоҷикистон 5 млн 186 ҳазору 800 воя ваксинаи зидди коронавирус ворид карда шудааст”, - омадааст дар хабари агентӣ.

Имрӯз дар Тоҷикистон барои эмкунии шаҳрвандон аз ваксинаҳои зерин истифода мешавад: "Спутник V" (истеҳсоли Русия), CoronaVac (Чин), AstraZeneca (Аврупо),  Moderna ва Pfaizer (ИМА).Ваксингузаронӣ бепул аст.

То 3 ноябри соли 2021 дар Тоҷикистон 2 млн 777 ҳазору 812 нафар (46,5%) ваксина гирифтанд. Аз давраи пурраи ваксинагирӣ, яъне гирифтани ду воя (доза) 2 млн 155 ҳазору 634 нафар (37%) гузаштаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.