Амирбек Темур, сардори Сарраёсати кишоварзии вилояти Хатлон зимни нишасти матбуотии рӯзи 12 июли соли равон якчанд омили болоравии нархи пиёзро гуфт.

“Яке аз омилҳои болоравии нархи пиёз дар соли равон кам кишт шудани пиёзи барвақтӣ мебошад. Дар маҷмӯъ 1,2 ҳазор гектар майдони кишти пиёз кам карда шудаст. Аз ҷумла дар ноҳияи Ҷайҳун кишти пиёз 1 ҳазор гектар ва 200 гектар дар дигар ноҳияҳо”, - гуфт Амирбеки Темур.

Амирбек Темур, сардори Сарраёсати кишоварзии вилояти Хатлон
Сурат: Asia-Plus

Номбурда ҳамчунин илова кард, ки сабабҳои дигари боло рафтани нархи пиёз дар бозорҳои кишвар болоравии нархи сузишвории дизелӣ ва нуриҳои минералӣ мебошад.

“Бубинед, ки нархи нуриҳои минералӣ ва сӯзишворӣ чанд маротиба боло рафт. Агар солҳои қаблӣ деҳқонон барои парвариши пиёз дар 1 гектар 12-13 ҳазор сомонӣ хароҷот мекарданд, имсол хароҷоти онҳо то 25 ҳазор сомонӣ расид. Баъдан соҳибкорон аз сари замин пиёзро 2-2,5 сомонӣ харидаву захира кардаанд. Ҳеҷ як деҳқон пиёзашро аз 2,5 сомонӣ зиёд нафурӯхтааст”, - изҳор дошт сардори Сарраёсат.

Ба гуфтаи Амибеки Темур, яке аз дигар омилҳо содироти пиёз ба хориҷи кишвар мебошад, ки соли равон ҳаҷми содироти он аз вилояти Хатлон 50 ҳазор тоннаро ташкил медиҳад.

 “Умедворем, ки бо мавриди истифода қарор гирифтани калонтарин корхонаи истеҳсоли нуриҳои минералӣ ,аз ҷумла карбамид - “Осиё кемикал” (ТоҷикАзот) дар шаҳри Левакант нархи маҳсулоти кишоварзӣ арзонтар мешавад”, - изҳори умедворӣ кард ӯ.

Амирбеки Темур изҳор дошт, ки ҳамчунин афзоиши майдони кишти пиёз ба нақша гирифта шудааст.

Қобили зикр аст, ки имрӯз дар бозорҳои кишвар пиёз  то 8 сомонӣ нарх дорад.

 

Дар Telegram, Facebook, Instagram, OK ва ВК бо мо бимонед.