Дар Тоҷикистон ҳоло беш аз 1600 нақлиёти барқӣ (электромобил) ба аҳолӣ хидмат мерасонад, ки нисфи он (800 адад) дар нимсолаи аввали соли ҷорӣ ворид карда шудааст. Дар ин бора Вазорати нақлиёти Тоҷикистон иттилоъ медиҳад.

Хабаргузории “Ховар” бо такя ба Хадамоти гумрук менависад, ки дар соли 2021 ба мамлакат ҳамагӣ 47 адад нақлиёти барқӣ ворид гардида, дар соли 2022 теъдоди онҳо ба 767 адад расидааст.

Инчунин, гуфта мешавад, ки шаҳрдории Душанбе дар чаҳорчӯби барномаи “Шаҳри сабз” дар се соли охир 104 адад троллейбуси бесим (15 километр), якчанд автобуси барқӣ ва як троллейбуси барқии бидуни тамос (40 километр) харидорӣ кардааст.

Аз шаҳрдории пойтахт “Азия-Плюс” хабар доданд, ки то аввали моҳи октябр шумораи таксиҳои бо барқ ​​ҳаракаткунанда ба 751 адад расидааст.

Чӣ заминаҳо гузошта мешаванд?

Шаҳрдории пойтахт масъулинро муваззаф кардааст, ки раванди ба системаи нақлиёти барқӣ гузаштани паркҳои ширкатҳои таксӣ, бунёди нуқтаҳои барқгирӣ ва дигар масъалаҳо чораҳои зарурӣ андешанд.

Дар Барномаи рушди нақлиёти барқӣ дар Ҷумҳурии Тоҷикистон барои солҳои 2023-2028 гуфта мешавад, ки бозори мошинҳои барқӣ дар кишвар дар марҳилаи ташаккул қарор дорад ва рушди он “заиф” арзёбӣ мешавад.

“Сабаби асосии рушд наёфтани бозори нақлиёти барқӣ дар Ҷумҳурии Тоҷикистон қимати гарони мошинҳои барқӣ, набудани нуқтаҳои барқгиранда, нигоҳдорӣ ва андешидани чораҳои ҳавасмандкунӣ мебошад”, - қайд мекунанд муаллифони Барнома.

Азим Иброҳим, вазири нақлиёт, дар як нишасти хабарӣ дар моҳи августи соли ҷорӣ набуди нуқтаҳои зарурӣ бо таҷҳизоти мувофиқ барои коркарди дубораи батареяҳои литийиро як камбуд номбар карда буд.

Дар ин робита, дар саросари ҷумҳурӣ аз 169 нуқтаи нерӯдиҳандаи ба нақша гирифташуда, то 1 июли соли равон 36-тоаш ба кор оғоз кардааст.

Ба иттилои манбаъ, то моҳи октябри соли 2023 дар шаҳри Душанбе 55 нуқтаи нерӯбахшӣ мавҷуд буда, корҳо барои тавсеаи инфрасохтори зарурӣ идома доранд.

Акс аз хабаргузории "Авесто"

Нархи баланди электромобилҳо

Дар асоси тағйиру иловаҳои Кодекси андоз воридоти электромобилҳо ба муддати 10 сол аз боҷи гумрукӣ, ҳамчунин аз андоз, андоз аз арзиши иловашуда ва аксиз озод карда шудааст. Аммо мушкилоти асосие, ки харидорони мошинҳои барқӣ бо он рӯбарӯ ҳастанд, қимати баланди он аст.

Кирокашони нақлиёти барқӣ мегӯянд, сабаби аслии пешниҳоди нархномаи монанд ба кирокашони анъанавӣ (бо сӯзишворӣ ҳаракаткунанда) гаронии нақлиёти барқӣ аст. Онҳо таъкид мекунанд, ки бояд тақрибан як сол мунтазам кор кунанд, то хароҷоти хариди нақлиётро пӯшонанд.

Нархи нақлиёти барқии мусофирбар дар бозори мошинҳои пойтахт аз 20 ҳазор доллар оғоз мешавад. Хариди он тавассути интернет боз ҳам гаронтар аст. Масалан, арзонтарин мошин (EV6 2023) бо масофаи 1000 километр дар сомонаи Electrocars.tj 280 ҳазор сомонӣ (ҳудуди 26 ҳазор доллар) арзиш дорад.

Дар ширкати Green auto, ки ба ҷумҳурӣ мошинҳои барқӣ таъмин мекунад, ба “Азия-Плюс” гуфтанд, арзонтарин мошини онҳо 26 ҳазор доллар арзиш дорад.

Дар Telegram, Facebook, Instagram, OK ва ВК бо мо бимонед.