Соли равон ба 110 ҳазор оилаи камбизоати Тоҷикистон 600 сомонӣ ҳамчун кумаки якдафъаина дода мешавад. Дар ин бора Шодихон Ҷамшед, муовини вазири тандурустӣ ва ҳифзи иҷтимоии аҳолии Тоҷикистон дар ҳамоише дар вазорат, ки ба муаррифии барномаи  давлатии расонидани Кумакҳои унвонии  иҷтимоӣ то соли 2030 бахшида шуда буд, хабар дод.

Ӯ гуфт, маблағи умумӣ аз ҷониби Бонки ҷаҳонӣ ҳамчун кӯмак барои ниёзмандон ҷудо шуда, ҳаҷми умумии он 6 млн доллар ё беш аз 60 млн сомонӣ аст.

Муовини вазир афзуд, ин кумак ба камбизоатоне дода мешавад, ки дар оила 3 кӯдаки ноболиғ, 2 маъюб ва ё як пиронсоли аз 65-сола боло доранд.

“Яъне он ба ҳамаи оилаҳои камбизоат, ки ҳоло беш аз 230 ҳазорро ташкил медиҳад, дода намешавад. Танҳо ба қисми осебпазир, ки ба се категорияи мавҷуда ҷавобгӯянд, дода мешавад”, - гуфт Шодихон Ҷамшед.

Ба гуфтаи вай, ҳамчунин, нафароне ки соли гузашта бо қарори ҳукумати кишвар 600 сомонӣ кумакпули якдафъаина гирифтанд, наметавонанд кумаки якдафъаинаи навбатиро гиранд.

Аз Вазорати тандурустӣ ва ҳифзи иҷтимои аҳолӣ гуфтанд, ҳоло ин маблағ аз сӯи Бонки ҷаҳонӣ ҷудо нашудааст ва бо шуруъи ин раванд шаҳрвандон ба таври алоҳида огоҳ карда мешаванд.

Бояд гуфт, ки қаблан, дар замони бемории ҳамагири Covid-19, низ Бонки ҷаҳонӣ ба 165 ҳазор хонаводаҳои камбизоати Тоҷикистон 500 сомонӣ кумакпулӣ дода буд ва ҳаҷми умумии маблағгузорӣ 82,5 млн. сомониро ташкил намуд.

Ёдовар мешавем, ки соли гузашта ба 209 ҳазору 547 оила эҳтиёҷманди кишвар 600 сомонӣ кумаки молиявии яквақта пардохт шуда буд. Маблағи умумӣ 285 млн сомониро ташкил намуд.

Дар ин бора Эмомалӣ Раҳмон, президенти кишвар дар паёмаш ба Маҷлиси олии Тоҷикистон дар соли 2022 таъкид карда буд.

Дар Telegram, Facebook ва Instagram бо мо бимонед.