Дар Тоҷикистон реҷаи таъмини аҳолӣ бо барқро танзим кардаанд. Дар як шабонарӯз ба аҳолӣ бояд 10 соат барқ дода шавад. Вале сокинони кишвар ҳамоно аз бенизомии реҷаи барқ шикоят карда, мегӯянд, ки аз 5 то 8 соат дар як шабонарӯз хонаҳояшон равшан асту халос.

 

“Се соат бештар аз соли гузашта барқ дода мешавад”

Эмомалӣ Раҳмон, раиси ҷумҳури Тоҷикистон рӯзи 27-уми ноябри соли ҷорӣ бо имзои як қарор Вазорати энергетика ва захираҳои об ва дигар ниҳодҳои таъминкунандаи барқро вазифадор кард, то “реҷаи таъминот бо барқ барои аҳолӣ”-ро ба тартиб дароранд.

Масъулини ин вазорат ба “Азия-Плюс” гуфтанд, ки Шабакаҳои тақсимоти барқ аллакай реҷаи интиқоли барқро ба танзим даровардааст ва мувофиқи ин реҷа, ба аҳолӣ дар як шабонарӯз бояд 10 соат: субҳ 3 соат (5:00 то 8:00) ва шом 7 соат (аз 16:00 то 23:00) барқ дода шавад.

Акси марбута
Акс аз gmk.center

Вале гуфтанд, ин реҷа доимӣ набуда, имкон дорад дар оянда боз ҳам каму зиёд шавад.

“Ҳоло нисбат ба ҳамин давраи соли гузашта аҳолӣ 3 соат зиёдтар бо нерӯи барқ таъмин ҳастанд (ҳамин шабу рӯзи соли 2023 нерӯи барқ 7 соат дода мешуд, - идора), вале ба гармиву сардии ҳаво нигариста, дар оянда боз реҷаи интиқоли нерӯи барқ кам ё зиёд мешавад”, - гуфт ҳамсӯҳбати мо.

 

Соли гузашта, Шабакаҳои тақсимоти барқ аз ниҳодҳои зертобеи худ талаб карда буд, ки аҳолиро дар як шабонарӯз бо 7 соат барқ таъмин кунанд. Вале он замон низ сокинон шикоят мекарданд, ки ин реҷа риоя намешавад ва масъулин "ҳар вақте хоҳанд барқ медиҳанд".

Шикояти сокинон: “аз 5 то 8 соат бо нерӯи барқ дорем”

Масъулин ҳарчанд иддао мекунанд, ки реҷаи таъмини нерӯи барқро ба танзим даровардаанд, вале мушоҳида нишон медиҳад, ки он дар музофот аз ҷониби кормандонашон риоя намешавад. Сокинони гуногуни музофоти кишвар, ба мисли шаҳру навоҳии Панҷакент, Айнӣ, Нуробод, Панҷ ва Фархор ба “Азия-Плюс” гуфтанд, ки дар як шабонарӯз аз 5 то 8 соат барқ доранду халос.

“Ҳоло намедонем, ки барқ кай рӯшан мешаваду боз кадом соат меравад. Ин бетанзимӣ боис шуд, ки яхдону телевизор ва дигар таҷҳизоти рӯзгорамон вайрон шаванд. Ман дар ҳама хонаам лампаҳои заряддор мондам, ки барқ равад ҳам, хона рӯшан монад, вале қувваи он ҳам басандагӣ намекунад. Маҷбурам, ки боз фонорик ва шамъ харам ва дар асри ХХ1 бо шеваи бобоӣ зиндагӣ кунам”, - гуфт як ҳамсӯҳбати мо аз Панҷакент.

Танҳо сокинони ҷамоатҳои Ёва, Унҷӣ, Ғозиён ва Ҳайдар Усмони ноҳияи Бобоҷон Ғафуров, ки ба шаҳри Хуҷанд наздик ҳастанд, тасдиқ карданд, ки дар як шабонарӯз 10 соат нерӯи барқ доранд.

Дар фасли сармо сокинони манотиқи Тоҷикистон асосан бо ангишту ҳезум ва ё таппак (саргини хушконидашудаи чорво) хонаҳои худро гарм мекунанд ва ҳоло бо оғози сардӣ талабот ба ин навъи сӯзишворӣ бештар гардидааст.

Аммо мушкили бебарқӣ дар шаҳрҳо, ба вижа дар пойтахти кишвар низ аҳолиро нигарон кардааст.

 

“Барои сарборӣ нашудан барқ дар пойтахт қатъ мешавад”

Сокинони Душанбе нигаронӣ мекунанд, ки аз оғози фасли зимистон дар шаҳри Душанбе ҳам "ғайрирасмӣ маҳдудияти интиқоли барқ ҷорӣ шудааст". Аз ҷумла сокинони маҳаллаҳои Гулистон, Зарафшон, 102, 103 ва наздикии Боғи Ғалаба қариб ҳамарӯза дар шабакаҳои иҷтимоӣ шикоят мекунанд, ки нерӯи барқ надоранд.

Аммо мақомоти масъул расман аз “лимит”-и барқ дар пойтахт хабар намедиҳанд ва аҳолиро огоҳ намекунанд, ки кадом соатҳо барқ қатъ мешавад.

Дар ин робита вақте аз Вазорати энергетика ва захираҳои об пурсидем, маҳдудияти интиқоли барқ дар шаҳри Душанберо рад карда, аммо гуфтанд, ки “дар ҳолати садама рух додан ё хатари садама пеш омадан, ки ба трансформаторҳо сарборӣ мешавад, нерӯи барқ чанд соат қатъ мешавад”.

 

Мушкили ҳарсолаи сокинони Тоҷикистон

Бояд гуфт, ки ҳамасола аз моҳи сентябр то апрел дар Тоҷикистон маҳдудияти нерӯи барқ ҷорӣ мешавад. Имсол аз 22-юми сентябр дар кишвар маҳдудият ё “лимит”-и барқ расман ҷорӣ шуд.

“Барқи тоҷик” ҳамон замон аз аҳолӣ хост, ки “ба зимистон омодагии ҳамаҷониба бинанд ва дар тирамоҳу зимистон нерӯи барқро сарфакорона истифода кунанд”. Сабаби ин тасмимро ширкат “сол аз сол зиёд шудани талаботи аҳолӣ ба барқ” унвон карда, гуфт, ки имкон дорад ба дарёи Вахш об камтар ояд.

Таъмини аҳолӣ бо нерӯи барқ дар тирамоҳу зимистону баҳор яке аз мушкилҳои асосии Тоҷикистон аст. Қаблан масъулини Вазорати энергетика ва захораҳои оби кишвар ва “Барқи тоҷик" гуфта буданд, ки то нерӯгоҳи “Роғун” пурра ба кор надарояд, “лимит”-и барқ дар кишвар боқӣ мемонад.

Сарфи назар аз камбуди барқ дар дохили кишвар, Тоҷикистон ҳамасола ба Афғонистон ва Ӯзбекистон барқ мефурӯшад. Ба иттилои Оҷонсии омори кишвар, дар 10 моҳи соли ҷорӣ аз Тоҷикистон ба хориҷи кишвар ба маблағи зиёда аз 102,4 млн доллар нерӯи барқ интиқол ёфтааст.

Дар Telegram, Facebook ва Instagram бо мо бимонед.