Владимир Путин, раисҷумҳури Русия ба Вазорати дифои Русия дастур дод, ки нерӯҳои боздорандаи ҳастаии артиши Русия дар ҳоли омодабоши вижа қарор гиранд. 

Ӯ ин дастурро рӯзи якшанбе, 27 феврал дар нишасте дар Кремлин бо ҳузури вазири дифоъ ва фармондеҳи Ситоди генералии нерӯҳои мусаллаҳи ин кишвар содир кард.

Раисҷумҳури Русия гуфт, ки мақомоти баландпояи кишварҳои ғарбӣ изҳороти ҳуҷум алайҳи Русияро баён кардаанд. Ӯ таҳримҳои кишварҳои ғарбиро "ғайриқонунӣ" хонд.

Дар ин ҳол Амрико ба дастури Путин дар мавриди қарор додани нерӯҳои ҳастаии Русия дар ҳоли омодабоши "вижа" посух дод.

Линда Томас Гринфилид, сафири Амрико  дар  Созмони Милал дар мусоҳиба бо шабакаи Си-Би-Эс ин иқдоми Русияро "ғайри қобили қабул" хонд.

Ба иттилои BBC ӯ гуфтааст, ки "ин ба маънои он аст, ки раисҷумҳур Путин ба гунае ба шидат бахшидани ин ҷанг идома медиҳад, ки комилан ғайри қобили қабул аст ва мо бояд ба қавитарин шакли мумкин иқдомоти ӯро мутаваққиф кунем"

Ёдовар мешавем, ки аз ҳамлаи Русия ба Укроин чаҳор рӯз мегузарад. Дар пайи ҳамлаи низомии Русия ба Укроин, таҳримҳои сахти ҷаҳонӣ алайҳи Русия ҷорӣ шудааст.

Дар TelegramFacebookInstagramOK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.