Дар чор моҳи охир Оҷонсии “Тоҷикстандарт” беш аз 191 тонна маҳсулоти бесифатро дар дӯконҳо ва бозорҳои Тоҷикистон ошкор кардаанд. Ин маҳсулот гӯшт, равған, ширинӣ, нӯшокиҳои спиртӣ ва ташнашикан, намак ва ғайра мебошад.

Дар ин бора аз Оҷонсии “Тоҷикстандарт” ба “Азия-Плюс” хабар доданд.

Мақомот мегӯянд, ки дар 4 моҳи соли 2025 ба миқдори 191,7 тонна маҳсулоти гуногуни пастсифат ошкор шудаанд.

Маҳсулоти гӯштӣ -11 тонна, равғани растанӣ -1,3 тонна, нӯшокиҳои спиртӣ - 725 литр, нӯшокиҳои ғайриспиртӣ - 1122 литр, маҳсулоти қаннодӣ - 267 кг, намак - 30 895 кг ва дигар маҳсулот дар озмоишгоҳҳои ин ниҳод ташхис ва ғайристандартӣ ҳисобида шудаанд.

“Қисми зиёди ин маҳсулот воридотӣ ба ҳисоб меравад, ки ғайристандартӣ дониста шуданд. Мутобиқи тартиби муқарраргардида, нисбат ба воридкунандагони ин маҳсулот чораҳои маъмурӣ андешида шуданд”,-гуфтанд дар ин ниҳод.

Назари худи соҳибкорон вобаста ба ин ҳолат маълум нест. Ҳамчунин гуфта намешавад, ки онҳо чӣ ҷазо гирифтаанд.

Дар ниҳоди манкур ҳам шарҳ надоданд, ки ин маҳсулоти пастсифат чӣ гуна ба кишвар ворид шуда, барои ин кӣ ва чӣ ҷазо гирифтаанд.

Худи соҳибкорон беш аз 84 ҳазору 377 кг маҳсулоти гуногуни хӯрокворӣ, ки мӯҳлати истифодаашон гузаштааст, ба оҷонсӣ супоридаанд.

Ёдрас мешавем, ки соли гузашта дар Тоҷикистон 1 миллиону 11 ҳазору 801 кг  маҳсулоти гуногуни хӯроквории бесифат ошкор шудааст, ки дар муқоиса бо соли гузашта наздики 500 тонна кам аст. 

Дар Telegram, Facebook ва Instagram бо мо бимонед.