Дар нимсолаи аввали соли ҷорӣ дар Тоҷикистон 539 ҳодисаи садамаи нақлиёт (соли 2023 - 492 ҳодиса) рух дода, бар асари онҳо 236 нафар ҳалок ва 570 нафар ҷароҳат бардоштаанд. Дар ин бора муовини аввали вазири корҳои дохилии ҷумҳурӣ Абдураҳмон Аламшозода хабар дод.
Дар муқоиса бо ҳамин давраи соли гузашта шумори ҳодисаҳо 11,8%, теъдоди ҷабрдидагон - 13,3% ва ҳалокшудагон - 22,3% зиёд шудааст.
“Сабабҳои зерин ба садамаҳо боис шудаанд: баланд кардани суръати ҳаракат - 58,6%, баромадан ба хатти муқобили ҳаракат дар роҳ - 25%, вайрон кардани қоидаҳои ҳаракат дар роҳ - 10% ва дигар навъҳои қоидавайронкунӣ, аз ҷумла дар ҳолати мастӣ аз машрубот рондани мошин - 7%”, - иброз дошт муовини вазир.
Зикр шуд, ки 7 ҳодисаи садамаи нақлиёт бо иштироки ноболиғон рух дода, дар натиҷа 7 нафар ҳалок ва 4 кас ҷароҳатҳои ҷисмонӣ бардоштаанд.
Ӯ зикр кард, ки ноболиғон аз ҳузур надоштани волидайни истифода бурда, пинҳонӣ сари чанбарак нишастаанд. Ҳамчунин дар ин давра 3 ҳодисаи садамаи нақлиёт бо иштироки донишҷӯён ба қайд гирифта шуда, бар асари онҳо 1 нафар ҳалок ва 3 кас ҷароҳат гирифтаанд.
Ғайр аз ин, 11 ҳолати бо автомашинаҳои шахсӣ ба дарсҳо омадани донишҷӯён ба қайд гирифта шуда, нисбати онҳо протоколҳо тартиб дода шудаанд.
Қобили зикр аст, ки дар Тоҷикистон ба донишҷӯён ва хонандагони мактабҳо ба дарс омадан бо автомашинаҳои шахсӣ қатъиян манъ аст. Касоне, ки ин қоидаро риоя намекунанд, аз муассисаи таълимӣ хориҷ карда мешаванд. Чунин тағйирот ба қонунгузорӣ тобистони соли 2017 аз ҷониби парлумон қабул шуд.
Руcский