Ширкати IRS марги ду корманди БДА-ро, ки гуфта мешуд, дар Варзоб зери тарма мондаанд, тасдиқ кард. Хабари марги онҳо 1-уми январ дар шабакаҳои иҷтимоӣ паҳн шуда буд.

Ин ширкат, ки масъули нигоҳубини роҳи Душанбе - Чаноқ аст ва барои он аз ронандагон пул мегирад, дар баёнияе ба хонаводаи Фаррух Ҳасанзода ва Саидмурод Ғанизода таслият гуфт ва зикр кард, ки онҳо “зимни иҷрои вазифаҳои хидматӣ ҳалок шуданд”.

Радиои Озодӣ навишт, ки ҷасади ду корманди БДА ба наздиконашон супорида шуда, дирӯз, 2-юми январ, маросими видоъ бо Фаррух Ҳасанзода дар ноҳияи Фирдавсӣ ва ҷанозаи Саидмурод Ғанизода дар зодгоҳаш Файзобод баргузор мешавад.

Қаблан Оҷонсии ҳавошиносии кишвар аз хатари фаромадани тарма дар роҳи Душанбе-Чаноқ ва қитъаи Майхӯраи ноҳияи Варзоб ҳушдор дода буд.

Боридани барф ва фаромадани тарма боиси мушкил ва маҳдудияти ҳаракати нақлиёт дар масири ягона аз пойтахт ба шимоли кишвар гардидааст. Ронандагони зиёд бо нашри наворҳо мегӯянд, дар баъзе қитъаҳо ҳаракат танҳо аз як самт иҷоза аст ва баъзан онҳо маҷбур мешаванд, соатҳо интизори боз шудани роҳ монанд.

Дар ҳамин ҳол, ширкати IRS мегӯяд, роҳ кушода аст.

Дар Telegram, Facebook ва Instagram бо мо бимонед.