Қарзи аҳолии Тоҷикистон ба ширкати “Барқи тоҷик”аз ҳисоби истифодаи нерӯи барқ наздики 1 млрд. сомониро ташкил медиҳад.

Раиси ширкати “Барқи тоҷик” Мирзо Исмоилзода дар нишасти матбуотии рӯзи 13 феврал дар ин робита изҳор намуд, ки ҳаҷми қарзи аҳолӣ ҳамасола меафзояд: соли 2018 онҳо беш аз 80 млн. сомонӣ маблағи истифодаи барқро напардохтаанд.

Бино ба гуфтаи Исмоилзода, соли гузашта аҳолии кишвар ба маблағи умумии 920 млн. сомонӣ бо нерӯи барқ таъмин шуда, ба суратҳисоби “Барқи тоҷик” бошад, ҳамагӣ 840 млн. сомонӣ маблағ ворид шудааст.

“Дар баъзе ҳолатҳо одамон нерӯи барқро сарфакорона истифода намебаранд. Имрӯз дар деҳот аксарият аз ҳисоби барқ хонаҳояшонро гарм карда, вақте ки барои он маблағи зиёд харҷу пардохташ талаб мешавад, бо дар мавсими зимистон замони 4 соат нерӯи барқ гирифтанашон муқоиса намуда,ба ҳайрат меоянд”, - иброз дошт раиси ширкат.

Ӯ аҳолиро ба истифодаи сарфакоронаи нерӯи барқ ва пардохти пурраи маблағи он даъват намуда, зикр кард, ки дар муқоиса бо солҳои пешин қобилияти пардохтпазирии одамон беҳтар шуда, оилаҳои камбизоат имтиёзҳо доранд.

“Мувофиқи қарори ҳукумат, дар мавсими тобистон барои ҳар оилаи камбизоат аз ҳисоби буҷет маблағи то 250 киловатт ва дар мавсими тобистон – то 150 киловат нерӯи барқ ҷуброн шуда, маблағи барқи аз ин меъёр зиёд истифодашударо оилаҳо пардохт мекунанд”, - шарҳ дод ӯ.

Ғайр аз ин, Исмоилзода дуздии нерӯи барқро аз ҷониби бархе аз ашхос қайд карда, зикр намуд, ки бархе аз истеъмолгарон истифодаи барқро бидуни ҳисобкунак ба роҳ монда, қоидаҳои истифодаи онро риоя намекунанд.

“Соли гузашта дар ҳаҷми 153 млн. кВт\соат дуздии нерӯи барқ ошкор шуда, ба маблағи умумии 43 млн. сомонӣ санадҳо тартиб дода шуданд, ки 31 млн. сомониаш аллакай ба суратҳисоби “Барқи тоҷик” ворид шуд”, - изҳор дошт вай.

Раиси ширкат таъкид дошт, ки сатҳи дуздии нисбатан зиёдтари барқ дар шаҳру навоҳии тобеи марказ, гурӯҳи ноҳияҳои Бохтари вилояти Хатлон ва ноҳияи Панҷакенти вилояти Суғд ба қайд гирифта шудааст.

Дар маҷмӯъ, илова кард ӯ, истифодабарандагони нерӯи барқ ба ширкати “Барқи тоҷик” беш аз 2,3 млрд. сомонӣ қарздоранд.

Қобили зикр аст, ки аз 1 октябри соли гузашта тарифи истифодаи нерӯи барқ барои аҳолӣ 19,37 дирам (2,05 сент)-ро ташкил медиҳад. То ин дам аҳолӣ барои истифодаи 1 кВт\соат нерӯи барқ 16,87 дирам маблағ пардохт мекард.

Дар Telegram, Facebook, Instagram, Viber, Яндекс.Дзен, OK ва Google Новости бо мо бошед.