Шаби 30 октябр, соати тақрибан 23 дар километри 558-уми шоҳроҳи Саратов – Нижний Новгород як мошини боркаши КамАЗ бо микроавтобуси "Volkswagen Caravelle”-и муҳоҷирони тоҷик бархӯрд.

Бино ба иттилои сомонаи расонаи мустақили Akhbor.com, дар ин садама ронандаи КамАз осеб надидааст, вале аз 11 нафар шаҳрвандони Тоҷикистон, ки савори микроавтобус буданд, ду нафар дар ҷои ҳодиса ва ду тани дигар дар бемористон ба ҳалокат расидаанд.

Гуфта мешавад, 7 шаҳрванди Тоҷикистон дар ин садама ҷароҳат бардоштаанд ва аз онҳо танҳо ду нафаре, ки захмҳояшон сабук буд, ба роҳи худ идома дода, 5 тани дигарро ба бемористон бурдаанд. Табибон вазъи саломатии 4 тан аз маҷрӯҳонро вазнин меноманд.

Зимнан зикр мегардад, ки ҳодиса дар ҳудуди ноҳияи Петровскийи вилояти Саратов дар шоҳроҳи Р-158 рух додааст ва ҳодисаро пулиси вилояти Саратов таҳқиқ мекунад. Муовини сухангӯи пулиси Саратов Владимир Костёров гуфтааст, ки зоҳиран гунаҳкори садама ронандаи КамАЗ аст. Аммо пулис дар ҳоли ҳозир аз ироаи ҷузъиёти бештари ин ҳодиса худдорӣ мекунад.