Пеш аз ҷанҷол дар Маскав, ки дар он зиёда аз 180 нафар иштирок карданд, ду муноқишаи дигар рух дода буданд. Дар ин бора имрӯз шабакаи телевизиони РЕН ТВ хабар дод.

Мувофиқи маълумоти шабака, чанде пештар аз ин ҳодиса дар шаҳри Химки байни муҳоҷирон муноқиша ба амал омадааст. Дар он зодагони Тоҷикистон якчанд нафарро аз ҷумҳуриҳои Осиёи Миёна лату кӯб карданд.

Баъдан, рӯзи 11 июл боз як ҷанҷоли дигар рух дод, ки дар он зодагони Тоҷикистон се нафар шаҳрвандони Қирғизистонро лату кӯб карданд. Ин се нафар дар бемористон бистарӣ шудаанд.

Дар навори пахшкардаи РЕН ТВ дида мешавад, ки ҷавонон дар пиёдагузар ба ҷанҷол оғоз намуда, сипас ба қисмати роҳ мегузаранд. Яке аз онҳоро ба замин афтонида, бо пой лату кӯб мекунанд.

Дар ҳамин ҳол, роҳбари шуъбаи минтақавии Конгресси умумиқирғизӣ дар Маскав Марсел Салахунов маълумот дар бораи пеш аз ин ҷанҷоли гурӯҳӣ, ки дар интернет паҳн шуд, рух додани муноқишаи дигарро тасдиқ кард.

“Тибқи маълумоти мо, ҷанҷол дар заминаи маишӣ сар задааст. Ҷавонон саққобозӣ (билярд) карда, байнашон нофаҳмие рух додааст. Дар ҳамон ҷо муноқиша рух додааст. Вақте он ба оихр мерасад, боз бо истифода аз яроқи сард давом мекунад. То ҷое ман огаҳам, он ҷо бархе захмӣ шудаанд”, - гуфтааст ӯ.

Салахунов ишора кардааст, ки намояндагони диаспораҳои тоқикону қирғизҳо изҳорот пахш карда, ҳамватанонро ба риояи оромиву осоиштагӣ даъват карданианд.

То замони нашри ин хабар ба “Азия-Плюс” муяссар нашуд, ки бо сафорати Тоҷикистон дар Русия тамос бигирад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.