Додгоҳи олии Тоҷикистон ҳукми додгоҳи шаҳри Ҳисорро дар мавриди парвандаи пурсарусадои таҷовузи духтараки ноболиғи 12-сола аз сӯйи яке аз пайвандонаш бекор кард. Дар ин бора як манбаъ аз Додгоҳи олии Тоҷикистон ба "Азия-Плюс" хабар дод. 

Ба гуфтаи манбаъ Додгоҳи олӣ баъди баррасии шикояти касатсионии ҷониби даъвогар, имрӯз, 12 январ ҳукми додгоҳи шаҳри Ҳисорро ба далели вуҷуди камбудиҳо ва нокофӣ будани далелҳо бекор карда, парвандарои барои таҳқиқи бештар ба додситонии шаҳрии Ҳисор боз гардонидааст. 

Додгоҳи шаҳри Ҳисор 9 декабр дар ин қазияи пурсару садо марди гумонбар дар таҷовузи ноболиғи 12-соларо барои 5 сол ба зиндон маҳкум намуд, вале ӯро бар асоси қонуни афв аз адои ҷазо озод намуд. 

Ин ҳукми додгоҳ дар ҷомеаи Тоҷикистон вокунишҳои тундеро ба бор овард. 

Додраси ин парванда Саидаҳмад Усмонзода ҳукми содиркардаи худро ба расонаҳо шарҳ надод ва ҷаласаи додгоҳӣ ҳам пушти дарҳои баста сурат гирифт. 

Ҳусниддин Абдуллоеви 42-соларо на бо моддаи таҷовуз ба номуси ноболиғ, балки барои анҷом додани ҳаракатҳои шаҳвонӣ бо шахси ба синни 16-солагӣ нарасида маҳкум карданд. 

Ин дар ҳоле буд, ки ҷониби вакили дифоъи ҷабрдида қотеъона таалаб мекард, ки гумонбар бар асоси моддаи 138 қисми 3 таҷовуз ба номус маҳкум шавад, вале ин талаби ҷониби ҳимоя ба эътибор гирифта нашуд. 

Хонаводаи ин ноболиғ, ки акнун 13-сола шудаасту аз ин робитаи ҷинсӣ як фарзанд ҳам таваллуд кардааст 8 моҳ пеш низ аз ҳукми дигари додгоҳ норозигӣ карда ба Додгоҳи олӣ шикоят оварда буданд. 

Шикояте, ки акнун баррасӣ шуд 18-уми декабр ба Додгоҳи Олӣ оварда шуда буд. 

Ин парванда яке аз парвандаҳои пурсару садо дар расонаҳо ва ҷомеаи Тоҷикистон аст, ки акнун таваҷҷуҳи зиёди ҷомеаи шаҳрвандиро ба худ кашидааст. 

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.