Ҳаҷми интиқоли маблағ аз Русия ба Тоҷикистон дар моҳи март ва нимаи аввали моҳи апрел 80 миллион доллар ё худ 50% кам шуд.

Дар ин бора дар мактуб-муроҷиати раисҷумҳури Тоҷикистон Эмомалӣ Раҳмон ба Хазинаи байнулмилалии асъор (ХБА) маълумот дода шудааст, ки дар он кумаки молиявӣ дархост мешавад.

Гуфта мешавад, ба интиқоли маблағ аз Русия “маҳдуд шудани сафарҳо ва нархи пасти нафт таъсир мерасонанд”.

“Камшавии ҳаҷми интиқоли пул шояд якчанд моҳ идома ёбад, ки ба коҳиши босуръати истеъмол ва афзоиши бекорӣ, инчунин фишор болои бозори асъор оварда мерасонад”, - таъкид шудааст дар мактуб.

Дар он қайд мешавад, ки душвориҳои вобаста ба воридоти маҳсулоти ғизоӣ ва дигар маводи ниёзи аввал ба беқурбшавии арзи миллӣ боис шуда, “эҳтимол ба таваррум фишор орад”.

Сарвари давлат дар номаи худ қайд кардааст, ки ба Бонки миллии Тоҷикистон аллакай лозим омад, қурби сомониро нисбат ба доллар 5% поин барад.

“Афзоиши назарраси касри буҷет дар назар аст, зеро даромадҳо коҳиш ёфта, ҳукумат маблағҳоро бояд барои пешгирии паҳншавии вирус, муолиҷаи беморон ва дастгирии камбизоатон сарф кунад”,- изҳор доштааст Эмомалӣ Раҳмон.

Ин мактуб рӯзи 29-уми апрел ба Хазинаи байнулмилалии асъор ирсол гардида, дар посух Шӯрои иҷроияи Хазина рӯзи 6-уми май ба Тоҷикистон ҷудо шудани 189,5 млн долларро тибқи механизми қарздиҳии тезонидашуда тасдиқ кард.

Он ба қонеъ сохтани талаботи таъҷилӣ ба маблағгузории тавозуни пардохт ва эҳтиёҷоти буҷет марбут ба пандемияи коронавирус равона мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.