Кумитаи ҳолатҳои фавқулода ва мудофиаи граждании  Тоҷикистон огоҳ мекунад, ки тибқи маълумоти обуҳавошиносон, рӯзҳои 26-27 май дар дарёҳои аз нишебиҳои ҷанубии қаторкӯҳҳои Ҳисор ҷоришаванда, дарёҳои Қизилсӯ, Ёхсӯ, Вахш (Сурхоб), Обихингоб, Зарафшон ва Исфара баландшавии сатҳи об пешгӯӣ мешавад.

Гуфта мешавад, шабонарӯзи наздик дар ноҳияҳои доманакӯҳӣ ва кӯҳии вилоятҳои Хатлон, Суғд, ноҳияҳои ғарбии ВМКБ ва Ноҳияҳои тобеи ҷумҳурӣ зуҳуроти сел аз эҳтимол дур нест.

Дар ҳамин иртибот, КҲФ аз сокинон хоҳиш мекунад чораҳои бехатарии шахсиро риоя намоянд. Аз рафтан ба шикор, моҳидорӣ ба соҳили дарёҳо, ғунучини ҳезум, ҷамъоварии занбурӯғ ва дигар зироатҳое, ки дар кӯҳҳову доманакӯҳҳо мерӯянд, худдорӣ намоянд. Ҳамчунин рафтан ба чорвочаронӣ ба соҳили махзанҳои об низ дар ин гуна рӯзҳои пурбориш маслиҳат нест.

Ба сокинон тавсия дода мешавад, ки аз фурсатҳои мусоид истифода намоянд ва селроҳаҳоро аз ҳар гуна селовардҳо тоза намоянд, то об ба ҳавливу майдонҳои кишти онҳо ворид нашавад.

Дар ҳолати ба вуҷуд омадани ҳолатҳои фавқулодда ё рух додани ягон ҳодиисаи нохуш шаҳрвандон метавонанд ба телефони 112 ё навбатдори фаврии Кумита: 93 880 28 19; 223-13-11 муроҷиат намоянд.

Ёдрас мекунем, ки бар асари офатҳои табиӣ, ки 11 май дар қаламрави ҷумҳурӣ рух доданд, 9 нафар ҳалок шуда, ҳадди ақалл дар 15 ноҳияи вилояти Хатлон ба манзили сокинон, қитъаҳои замини наздиҳавлигӣ, заминҳои кишт, иншооти ёридиҳанда ва роҳу пулҳо зарари хеле зиёд расонида шуд.

Бар асари офатҳои табиӣ дар Тоҷикистон, ки нимаи аввали моҳи май рух доданд, зиндагии муқаррарии зиёда аз 14,5 ҳазор нафар халалдор шуда, имрӯз онҳо ба кумаки равонӣ ниёз доранд. Дар натиҷаи офат 128 хона пурра тахриб (вайрон) шуда, ба 400 манзил осеби назаррас расонида шуд. Дар ин бора дар таҳқиқоти муштараки ҳукумати Тоҷикистон ва муассисаҳои марбутаи СММ маълумот дода мешавад.

Зикр мешавад, ки ин ҳоло натиҷаи ниҳоӣ набуда, арзёбии зарар аз ҷониби ҳукумат идома дорад.

Президенти Тоҷикистон Эмомалӣ Раҳмон дирӯз зимни суҳбати телефонӣ бо раиси вилояти Хатлон Қурбон Ҳакимзода ба ӯ дастур дод, ки баҳри ҳарчи зудтар бартараф намудани оқибатҳои офати табиӣ чораҷуйӣ кунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.