Дар гузориши нави вазорати умури хориҷии Амрико вазъи озодиҳои мазҳабӣ дар Тоҷикистон нигаронкунанда гуфта шуда, Тоҷикистон ба феҳристи "кишварҳои махсусан нигаронкунанда", ворид карда шудааст.

Бино ба иттилои Радиои Озодӣ бо истинод ба ин гузориш, ки рӯзи панҷшанбеи 4-уми январ мунташир шуд, дар баробари Тоҷикистон ҳамчунин 9 кишвари дигар - Мянмар, Эрон, Кореяи Шимолӣ, Узбакистон, Арабистони Саудӣ, Туркманистон, Эритрея, Судон ва Чин низ шомил шудаанд. Покистон дар феҳристи "назорати вижа" гунҷонида шудааст.

Гуфта мешавад, аз нигоҳи Амрико ва ғарбиён воқеан дар Тоҷикистон маҳдудиятҳои зиёди динӣ вуҷуд дорад ва манъи вуруди ҷавонони то 18-сола ва занҳо ба масҷид, пӯшидани либоси мазҳабӣ ва доштани риш аз намунаи чунин маҳдудиятҳо мебошад».

Зикр мегардад, ки ҳамон тавре ки дар гузашта мақомот танқиди созмонҳои байналмилаливу давлатҳои хориҷиро аз маҳдуд шудани озодиҳо, аз ҷумла озодиҳои мазҳабӣ дар Тоҷикистон рад кардаанд, ин навбат низ масъулини дин бо интиқодҳои Вазорати умури хориҷии Амрико розӣ нестанд.

Сулаймон Давлатзода, раиси Кумитаи корҳои дин, танзиму анъана ва маросимҳои Тоҷикистон гуфтааст, ин гузориш бар пояи ахбори расонаҳо таҳия шудааст ва аз воқеият дур мебошад.

«Ҳоло мутахассисони ин ниҳод матни пурраи ин гузоришро мавриди омӯзиш қарор дода, сипас расман вокуниши худро эълон мекунанд, - афзудааст номбурда. - Дар гузоришҳои Амрико ҳамвора аз Тоҷикистон беасос ба унвони кишвари маҳдудкунандаи озодиҳои мазҳабӣ ном бурда мешавад, вале дар асл ин тавр нест».