Дар зарфи 6 моҳи соли равон 89 ҳазору 493 нафар занон Тоҷикистонро тарк кардаанд: бисёре аз онҳо аз интизории шавҳаронашон аз Русия хаста шуда, муҳоҷирати кориро ихтиёр намуданд, изҳор дошт зимни нишасти матбуотӣ раиси Кумитаи кор бо занон ва оилаи назди ҳукумати Тоҷикистон Ҳилолбӣ Қурбонзода.
“Дар муқоиса бо ҳамин давраи соли гузашта, ки он замон 57 ҳазору 451 нафар занон ба муҳоҷират рафта буданд, тавре ки мебинем, ин нишондиҳанда хеле зиёд шудааст”, - зикр кард ӯ.
Ҳилолбӣ Қурбонзода сабаби аслии ин тамоюлро зикр кард: бисёре аз занон аз интизории тӯлонии шавҳаронашон, ки маҷбуранд дар Русия кор кунанд, бо мушкилот ва нороҳатиҳо рӯбарӯ мешаванд.
«Ҷудошавии тӯлонии оила ба занҳо фишори равонӣ ва иҷтимоӣ оварда, онҳо ҳарчи бештар тасмим мегиранд, ки дар ҳаёти иқтисодӣ фаъолона иштирок намоянд ва ҳамроҳи шавҳаронашон дар хориҷа ҷойи кор пайдо кунанд ё дертар ба назди онҳо раванд», - гуфт раиси Кумита.
Ба гуфтаи вай, Кумита дар ҳамдастӣ бо мақомоти марбута роҳу воситаҳои беҳтарини дастгирии занонро барои пешгирӣ аз муҳоҷират ҷустуҷӯ мекунад.
Хилолбӣ Қурбонзода мӯътақид аст, ки агар шавҳарон пас аз муҳоҷират бештар ба назди хонаводаҳояшон бармегаштанд, шояд теъдоди занони хоҳишманди ба хориҷа рафтан бамаротиб камтар мешуд.
Раиси Кумита зикр кард, ки сабаби дигари афзоиши теъдоди занони муҳоҷир аз Тоҷикистон дарёфти кор барои модарони танҳо аст.
Қурбонзода бо таассуф таъкид кард, ки ҷойҳои кории холии дастрас дар дохили кишвар аксар вақт барои ин тоифаи занон ҷолиб нестанд. Маош, ба гуфтаи онҳо, аксаран нокофӣ буда, онҳоро водор мекунад, ки муҳоҷиратро ихтиёр кунанд.
"Ин ҳолат масъалаи муҳими дастгирии иҷтимоии модарони танҳо дар Тоҷикистонро ба миён меорад, ки кумита рӯйи он кор мекунад", - таъкид дошт Ҳилолбӣ Қурбонзода.
Ба гуфтаи ӯ, кумита барои беҳбуди сатҳи огаҳии занон аз ҳуқуқ ва имконоти худ барномаҳо ва маъракаҳои омӯзишӣ роҳандозӣ мекунад, ки ба онҳо ҷиҳати қабули қарори оқилона ва ҳимоя аз манфиатҳояшон кумак мекунад.
Кумита инчунин тавассути расонидани кӯмаки молиявӣ, машварат бобати тарҳрезии тиҷорат ва дастрасӣ ба захираҳо барои рушди тиҷорати шахсӣ фаъолияти соҳибкории занонро ҳавасманд мекунад.
Ба гуфтаи ӯ, барои мисол, аз аввали соли 2023 ба занон дар Тоҷикистон ба маблағи 2 млн 217 ҳазору 510,7 сомонӣ қарз дода шудааст, ки нисбат ба ҳамин давраи соли гузашта 563 ҳазору 958,9 сомонӣ бештар аст.
Руcский