Бонки осиёии рушд (БОР) коҳиши интиқоли маблағро аз ҷониби муҳоҷирони кории тоҷик аз Русия ба Тоҷикистон ба андозаи 25% - аз 2,25 млрд доллар дар соли 2021 то ба 1,69 млрд доллар дар соли 2022 пешгӯӣ мекунад, хабар дода мешавад дар гузориши ин ниҳоди молиявӣ.
“Ин оқибатҳои ҷиддии иҷтимоӣ хоҳад дошт, зеро зиёда аз 50% хонаводаҳо (тақрибан 735 ҳазор нафар) асосан ба интиқоли пул такя мекунанд”, - таъкид месозанд таҳлилгарони Бонк.
Гуфта мешавад, сокинони минтақаҳо ва ноҳияҳои камбизоаттарини кишвар талаботи худро ба маҳсулоти ниёзи аввал аз ҳисоби маблағи интиқолёфта таъмин мекунанд.
Иқтисодчиёни БОР пешгӯии худро ба камшавии ҷойҳои корӣ дар соҳаҳои иқтисоди Русия, аз ҷумла бахшҳои хидматрасонӣ ва сохтмон, ки муҳоҷирони тоҷик маъмулан дар онҳо кор мекарданд, асоснок мекунанд.
Дар гузориш зикр мегардад, ки Тоҷикистон ба интиқоли пул, ки 80%-аш аз Русия ирсол мешаваду ҳудуди 1 млн нафар тоҷикистониён дар ин кишвар машғули коранд, вобастагии зиёд дорад.
Қаблан директори генералии БОР оид ба Осиёи Марказӣ ва Ғарбӣ Евгений Жуков дар бораи хавфи баланди коҳиши интиқоли маблағ аз ҷониби муҳоҷирони корӣ аз Русия бар асари қисман сафарбарии ҳайати захираҳои ҳарбӣ дар Русия изҳори назар карда буд.
Зимни посух ба саволи хабарнигори “Азия-Плюс” дар брифинги матбуотии маҷозӣ (виртуалӣ) рӯзи 29 сентябри соли равон Евгений Жуков гуфт, бозгашти теъдоди зиёди муҳоҷирони тоҷик ба ватан бо шаҳрвандии Русия ба ҳаҷми интиқоли пул ба ҷумҳурӣ таъсири манфӣ мерасонад.
Намояндаи БОР зикр кард, ки зиёда аз 200 ҳазор нафар шаҳрвандони Тоҷикистон, ки ҳамчунин шаҳрвандии Русияро доранд, дар қаламрави ин кишвар кор мекунанд.
Қобили зикр аст, ки мақомоти Тоҷикистон аз пешниҳоди маълумот ба намояндагони ВАО дар бораи ҳаҷми интиқоли пул худдорӣ мекунанд, ҳарчанд дар ин бора ҳеҷ гуна маҳдудияти қонунӣ вуҷуд надорад.
Қаблан ВАО-и Тоҷикистон ин маълумотро дар сомонаи Бонки марказии Русия дарёфт мекарданд. Аммо пас аз оғози муноқишаи мусаллаҳона байни Русия ва Украина, ин ниҳоди молиявии Русия аз нашри чунин маълумот худдорӣ мекунад. Дар бораи сабабҳо ва мӯҳлати боздоштани нашри чунин маълумот чизе зикр намешавад.
Бонки марказии Русия ҳар семоҳа дар бораи интиқолҳои пулии фаромарзӣ маълумот нашр мекард. Охирин маълумоти сомона дар ин бора нимаи дуюми моҳи март (аз натиҷаҳои соли 2021) нашр шуда буд.
Дар соли 2021 маблағи умумии интиқоли пул аз ҷониби шахсони воқеӣ аз Русия ба Тоҷикистон 1,8 млрд долларро ташкил дода буд, ки 3,4% зиёдтар нисбат ба соли 2020 мебошад.
Зиёда аз 76%-и ин интиқолҳо аз ҷониби шаҳрвандони Тоҷикистон, қариб аз чор як ҳиссаи он - аз ҷониби шаҳрвандони Русия ва/ё шахсони бо Ҳуҷҷати иҷозаи зист (ВНЖ) дар Русия иқоматдошта анҷом дода шудаанд. Дар ҳаҷми умумии ин маблағҳо 94,3%-ро рубл, 5,6%-аш - доллар ва 0,1%-ашро - евро ташкил медод.
Руcский