Додгоҳи шаҳри Дюсселдорфи Олмон панҷ нафар зодагони Тоҷикистонро барои ҳамкорӣ бо гуруҳи Давлати исломӣ (ДОИШ) ва тарҳрезии амалҳои террористӣ дар ин кишвар ба муҳлатҳои гуногуни зиндон маҳкум кард, хабар медиҳад маркази матбуоти додгоҳи Дюсселдорф.
Мурофиаи додгоҳӣ нисбат шаҳрвандони Тоҷикистон, ки аз 25 то 34-солаанд, аз 19 то 31 май давом кардааст.
Гуфта мешавад, додгоҳ Суннатулло К.-ро ба 9,6 сол, Фарҳод К.-ро - ба 8,6 сол, Азизҷон Б.-ро ба 6,8 сол, Муҳаммадалӣ Г.-ро ба 3,8 сол ва Комрон Б.-ро ба 4,8 соли зиндон маҳкум кард.
“Дар доираи омодагӣ ба ҷиҳоди мусаллаҳона гумонбарон аз моҳи январи соли 2019 дар чат бо яке аз пешвоёни Давлати исломӣ дар Афғонистон робита дошта, аз лиҳози таблиғотӣ таълим гирифтаанд”, - омадааст дар хабари додгоҳ.
Гуфта мешавад, ҳукм ҳоло мавриди амал қарор нагирифта, айборшудагон ва адвокатҳои онҳо метавонанд ба зинаи таҷдиди назар шикоят кунанд, ки онро Додгоҳи федералӣ баррасӣ мекунад.
Тавре ки Deutsche Welle иттилоъ медиҳад, зодагони Тоҷикистон дар Олмон нимаи моҳи апрели соли 2020 боздошт шуданд. Онҳо барои дарёфти паноҳгоҳ ба ин кишвар омада буданд.
Гуфта мешавад, нахуст пешбинӣ шуда будааст, ки онҳо ба Тоҷикистон рафта, дар амалҳои мусаллаҳонаи зиддиҳукуматӣ дар сафи террористони ДОИШ иштирок мекунанд, лекин баъдан таваҷҷуҳи онҳо ба ҳадафҳо дар Олмон равона мешавад.
Аз ҷумла, онҳо ба омӯзиши имконоти ҳамла ба ду пойгоҳи ҳарбии ИМА дар Олмон, ба қатл расонидани як эронии ба динӣ насронӣ гузашта ва интиқодгари дини ислом шурӯъ мекунанд.
Руcский