Душанбе. 25-уми май. ОИ «Азия-Плюс» - Имрӯз дар ҳамаи мактабҳои таҳсилоти умумӣ ва литсейҳои ҷумҳурӣ барои хатмкунандагон маросими «Занги камолот» баргузор шуд. Соли равон дар ҷумҳурӣ 84 ҳазору 309 хонандаи синфи 11 ва 153,7 ҳазор толибилми синфи 9 мактабро хатм мекунанд.

            Чӣ тавре ки ба ОИ «Азия-Плюс» аз Вазорати маорифи ҶТ иттилоъ доданд, маросими мазкур муддати як соат идома ёфта, сипас хонандагон тибқи нақшаи таълим ба дарсҳо сафарбар шуданд.

            Дар маросими ботантана хатмкунандагонро намояндагони Вазорати маориф, роҳбарони шӯъбаҳои маорифи шаҳриву ноҳиявӣ, мақомоти иҷроияи маҳаллии ҳокимияти давлатӣ, омӯзгорон ва волидайни толибилмон табрик намуданд.

            Ёдрас мекунем, ки шурӯъ аз соли 2007 мувофиқи фармоиши президенти Тоҷикистон, бо мақсади сарфаи хароҷот аз ҷониби волидайн ва таъмини амнияти хатмкунандагон баргузории чорабиниҳои мактабӣ бахшида ба «Занги охирин» ва «Иди алифбо ва ҳамчунин доир сохтани сайругашти хатмкунандагон бо мошинҳо дар ҳудуди шаҳру ноҳияҳо ва мавзеъҳои истироҳатӣ» мамнӯъ эълон гардид.