Дар пайи бозхонди иҷозатномаи QIWI-банк аз сӯйи Бонки марказии Русия, фаъолияти низоми пардохти “CONTACT” низ қатъ гардид. Оператори ин низоми пардохт QIWI-банк аст.
Низоми пардохти “CONTACT” миёни муҳоҷирони тоҷик маъмул буд ва маблағи онҳоро ба ватан интиқол медод. Баъди боздошти фаъолияти ин низоми пардохт муаммои гирифтани маблағҳои тавассути низоми мазкур интиқолгардида ва бозпас гирифтани маблағҳои интиқолшуда ба миён омад.
Ин мушкилро Бонки миллии Тоҷикистон низ тасдтиқ карда, зикр мекунад, ки барои ҳалли он талош дорад.
“Бонки миллии Тоҷикистон ҳолати мазкурро зери назорат ва мониторинг қарор дода, бо намояндагони низоми болозикр дар тамос мебошад ва ҷиҳати иҷрои уҳдадориҳои низом дар назди шаҳрвандон корбарӣ намуда истодааст”, - зикр мегардад дар изҳороти Бонки миллии Тоҷикистон.
Танзимгари низоми бонкии Тоҷикистон таъкид мекунад, ки дар мавриди пайдо гардидани маълумоти нав иловатан хабар дода мешавад.
Дар ҳамин ҳол, маълум нест, ки барои баргардонидани маблағи интиқолшуда аз имконоти Маркази миллии протсессингии интиқоли маблағҳои дар назди Бонки миллии Тоҷикистон амалкунанда истифода хоҳад шуд ё не.
Зеро соли 2019, вақти ба кор оғоз кардани ин марказ, зикр гардид, ки “мақсади асосии таъсиси Маркази миллии протсессингӣ аз баланд бардоштани самаранокии фаъолияти низоми интиқоли маблағҳо, таъмин намудани шаффофияти амалиётҳо ва коҳиш додани хавфҳои транзаксионӣ бо мақсади таъмин намудани устувории низоми бонкию молиявӣ дар кишвар ва ба амал овардани заминаи мусоид барои амалиётҳои бехавф иборат мебошад”.
Он замон танзимгари низоми бонкии Тоҷикистон созмонҳои қарзии хориҷиро, ки низоми пардохташон дар Тоҷикистон фаъолият мекард, муваззаф намуд, дар Бонки миллии Тоҷикистон суратҳисоби муросилотӣ боз кунанд. Ва танҳо дар сурати мавҷуд будани миқдори муайяни маблағ дар ин ҳисобҳо, иҷозат дода шуд, ки фаъолият кунанд. Танзимкунанда миқдори пулеро, ки бояд дар ин ҳисобҳо бошад, мушаххас накардааст.
“Бе зарурат ба Русия сафар накунед”. Шарҳи ВКХ Тоҷикистон оид ба банд мондани садҳо муҳоҷири тоҷик дар фурудгоҳҳои Русия
"Репатриант" – роҳи дигари муқим шудан дар Русия. Ин чӣ мақом аст ва кӣ метавонад аз он истифода кунад?
Ҳукумати Тоҷикистон ба НБО “Роғун” 5,5 млн доллар маблағи иловагӣ равона мекунад
Сафири Русия ба ВКХ даъват шуд. Тоҷикистон нигаронии худро оид ба эҷоди мушкил дар вуруди шаҳрвандонаш ба Русия иброз дошт
Роҳбари ҶДММ “Лоиқ”: “Санҷиши Агентии зиддифасод дахолат ба фаъолияти соҳибкорӣ аст”
Тоҷикистон медал намегирад? Пешгӯии таҳлилгарон оид ба Олимпиада-2024
Бо пешниҳоди Эмомалӣ Раҳмон. Шукурҷон Зуҳуров раис интихоб шуд
Даргузашти раиси пешини шаҳри Душанбе
Мансабдори пешини қирғиз, ки як санад оид ба марзи Тоҷикистону Қирғизистонро имзо карда буд, аз зиндон озод шуд
Тасарруфи беш аз 142 ҳазор сомонӣ зимни сохтмони як бинои Маркази миллии тестӣ
Кулли ахбор
Авторизуйтесь, пожалуйста