Дар ҷараёни тренинги дурӯза, ки мирӯз дар Душанбе ба кор оғоз кард, намояндагони наздик ба 40 ширкату ташкилотҳои Қазоқистон, Қирғизистон ва Тоҷикистон оид ба масоили дар ширкатҳо ташкил кардани шӯрои мудирони пурсамар табодули таҷриба ва изҳори назар мекунанд.

Чорабинӣ аз ҷониби Корпоратсияи байнулмилалии молиявӣ (IFC) бо мақсади кӯмак ба ширкатҳои минтақаи Осиёи Марказӣ дар такмили низоми идоракунии корпоративӣ, беҳбуди фаъолияти корбурди онҳо ва осонкунии дастрасӣ ба маблағгузорӣ созмон дода шудааст.

Ба гуфтаи намояндагони IFC, чорабинии мазкур ҳамчун як қисмати стратегияи IFC оид ба тақвияти имконот дар маҳалҳо барои фирмаҳои машваратӣ ва ташкилотҳои ғайриҳукуматӣ бо шумули бонкҳои Қирғизистону Тоҷикистон тренинги омӯзишӣ маҳсуб ёфта, минбаъд онҳо ба ширкатҳои маҳаллӣ ва бонкҳо оид ба масоили беҳбуди идоракунии корпоративӣ кӯмак мерасонанд.

Муовини раиси Иттиҳодияи бонкҳои Тоҷикистон Валерий Ким мегӯяд, баргузории тренинги мазкур хеле саривақтист, зеро дар кори он ба ҷуз бонкҳо ва ташкилотҳои бузурги молиявии хурд, ҳамчунин Маркази байнибонкии тренингӣ низ ширкат меварзад, ки минбаъд оид идоракунии коропративии ташкилотҳои молиявӣ ва корпоратсияҳои бузург дар Тоҷикистон маълумоти касбӣ пешниҳод мекунад.

Дар ҳамин ҳол, президенти Иттифоқи бонкҳои Қирғизистон Анвар Абраев дар мусоҳиба ба хабарнигори ОИ «Азия-Плюс» гуфт, тез-тез созмон додани ба ин монанд чорабиниҳо аз манфиат холӣ нест. «Чунин вохӯриҳо хеле муфиданд, зеро барои шиносоӣ бо таҷрибаи кишварҳои ҳамсоя дар масъалаи ҷорисозии идоракунии корпоративӣ ва табодули таҷриба дар ин самт имконоти хуб муҳайё мегардад», - гуфт ӯ.

Ба қавли менеҷери лоиҳаи IFC Сергей Трипутеня, шӯрои мудирони ҳирфавӣ яке аз таркибҳои калидии низоми қобили қабули идоракунии корпоративӣ аст. «Таъмини шаффофият ва беҳбуди сатҳи касбии аъзои шӯрои мудирон бояд самтҳои афзалиятноки фаъолияти ширкатҳо бошанд», - таъкид кард номбурда.