Шаби гузашта дар деҳаи Барсеми ноҳияи Шуғнон бори навбатӣ селобаҳо ҷорӣ шуданд.

Сухангӯи раиси ВМКБ Раҳмонқул Раҳмонқулов ба «Азия-Плюс» дар ин робита иттилоъ дод, ки бар асари ҷоришавии ин селобаҳо як муддате маҷрои дарёи Ғунд боз баста шуд.

Ба гуфтаи ӯ, аз кӯли сунъие, ки дар натиҷаи ҷорӣ шудани селобаҳои тайи чанд рӯзи ахир пайдо шудааст, об ҷорӣ шуда, айни замон бо маҷро ба поён меравад. «Айни замон хатари ҷамъшавии минбаъдаи об дар обанбори сунъӣ вуҷуд надорад», - гуфт ӯ.

Дар идома номбурда зикр кард, ки вале то ҳол такроран фаромадани сангпораҳои кӯҳӣ вуҷуд дорад, ки метавонанд маҷрои дарёро банданд.

Ӯ таъкид дошт, ки бари селобае, ки маҷрои дарёи Ғундро бастааст, айни замон то 1 километр расида, дарозии обанбори сунъии пайдошуда ҳудуди 2 километрро ташкил медиҳад.

Раҳмонқулов қайд кард, ки тибқи маълумоти пешакӣ, наздики 60 манзил зери об мондааст. «Мардуми аз манзил маҳрумшуда муваққатан дар хаймашаҳраки деҳаи наздики Манем иқомат доранд», - афзуд ӯ.

Қаблан иттилоъ дода будем, ки вазъи баамаломада дар ноҳияи Шуғнони ВМКБ бар асари офати табиӣ тадриҷан ба эътидол омада, сатҳи об дар кӯли пайдошуда дар натиҷаи фаромадани селу лойқа тайи рӯзҳои ахир ба таври назаррас поин рафтааст.