Адвокатураи Тоҷикистон дар марҳилаи ислоҳот қарор дорад. Узви Раёсати ҳайати мушовараи адвокатҳои «Сипар» ва намояндаи гурӯҳи ташаббускор Абдуқаюм Юсуфов ба хабарнигори ОИ «Азия-Плюс» роҷеъ ба марҳилаҳои раванди мазкур маълумот дод.

Ба гуфтаи вай, 17-уми октябри соли равон аз ҷониби роҳбарони шаш ташкилоти адвокатҳои кишвар дар чаҳорчӯби Барномаи ислоҳоти судӣ-ҳуқуқӣ дар ҶТ барои солҳои 2011-2013, ки аз ҷониби президенти ҶТ тасдиқ шудааст, Созишнома дар бораи ҳамкорӣ дар ҷараёни ислоҳоти қонунгузорӣ ба имзо расид, ки фаъолияти ниҳоди адвокатураи Тоҷикистонро танзим менамояд.

Ҳамин тариқ, бо мақсади роҳандозии ислоҳот дар ниҳоди адвокатура дар Тоҷикистон гурӯҳи ташаббускори ҷамъияти адвокатҳо таъсис дода шуд. Дар таърихи 27-уми марти соли равон бо мақсади баланд бардоштани нақши адвокатура ҳамчун ниҳоди конститутсионӣ, барқарор кардани тавозуни манфиатҳои тамоми субъектҳои баҳс оид ба истифодаи қонунгузорӣ, такмил ва татбиқи пурсамари Барномаи давлатӣ оид ба амалисозии Консепсияи рушди қонунгузории Тоҷикистон дар бахши сохтори давлатӣ, мақомоти ҳифзи ҳуқуқ, мудофиа ва амният, гурӯҳи ташаббускор ба ҳукумати кишвар, вазорати адлия ва Маркази миллӣ оид ба қонунгузориии ҶТ муроҷиат кард.

«Дар муроҷиат ҷамъияти адвокатҳо пешниҳод намуд, ки намоянагони адвокатура ба ҳайати гурӯҳҳои корӣ оид ба таҳияи лоиҳаи қонун «Дар бораи адвокатура», такмили қонуни ҶТ «Дар бораи муроҷиати шаҳрвандон», таҳияи лоиҳаи қонун «Дар бораи ворид намудани тағйироту илова ба Кодекси ҶТ дар бораи қонунвайронкуниҳои маъмурӣ», такмили масоили истеҳсолоти судӣдар ҶТ, таҳияи Кодекси ҷиноӣ дар таҳрири нав шомил карда шаванд», - идома дод Юсуфов.

Номбурда афзуд, қонунҳои зикршуда, ки ба таҳрирри нав ва такмил ниёз доранд, бевосита ба фаъолияти адвокат дар мавриди ҳимоя ва пуштибонӣ аз манфиатҳои шаҳрвандон марбутанд.