Кормандони мақомоти милитсия пойтахт сокини ноҳияи Рудакиро барои ҷалби фарзанди маъюбаш ба ҷамъоварии маблағ боздошт карданд.

Тибқи иттилои Раёсати ВКД дар шаҳри Душанбе, зимни санҷиш муайян шудааст, ки ин шаҳрванд Хуршед Ҳабибуллоев, соли таваллудаш 1971, истиқоматкунандаи деҳаи Арбобхотун буда, ҷавони дар аробачаи маъюбӣ нишаста фарзанди 17-солаи ӯ мебошад.

Нисбат ба Хуршед Ҳабибуллоев, ки бо истифода аз муҳтоҷиву дардмандии фарзанди худ ба ҷамъоварии маблағ машғул будааст, парвандаи маъмурӣ тартиб дода шудааст. Бо қарори суд нисбаташ ҷарима ба андозаи 7 нишондиҳанда барои ҳисобҳо таъин гардида, барои дар оянда такроран содир накардани кирдори мазкур огоҳонида шудааст.

Рӯзи 7-уми июл дар як қатор шабакаҳои иҷтимоӣ наворе пайдо шуд, ки тибқи иттилои муаллиф, ҳар саҳар марде як ҷавони маъюбро дар аробачаи махус шинонида, ба назди бозорчаи маҳаллаи 33-юми шаҳри Душанбе меорад. Ин навраси маъюб то бегоҳ ба талбандагӣ машғул мешавад. Сипас бо фаро расидани шом мард боз ба ҳамин мавзеъ омада, маблағҳои дар давоми рӯз ҷамъгшударо ба ҷайби худ андохта, писарбачаро бо худ мебарад.

Ин навор мавриди вокуниши шадиди шаҳрвандон, махсусан корбарони шабакаҳои иҷтимоӣ қарор гирифта, онҳо аз Раёсати ВКД дар шаҳри Душанбе талаб карданд, ки нисбат ба кирдорҳои авомфиребонаи марди дар навор инъикосшуда чораҳои қонунӣ андешида шавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.