Маҷлиси намояндагони Маҷлиси Олии Ҷумҳурии Тоҷикистон дар иҷлоси рӯзи чаҳоршанбе, 15 октябр, пас аз баррасии тӯлонӣ аз тасдиқи Протоколи Киото худдорӣ кард.
Намояндагони парлумон таъкид карданд, ки таъйиди ин санади байналмилалӣ метавонад дар роҳи тавсеъаи саноеъ ва бахши кишоварзии Тоҷикистон монеъ эҷод кунад.
Маҳбуба Нуриддинова, раиси кумитаи парлумон дар умури иҷтимоӣ, хонавода, беҳдошт ва муҳити зист, ки Протоколро муъаррифӣ мекард, пайвастани Тоҷикистон ба ин санади байналмилалиро дар роҳи ҷалби сармояи бештари хориҷӣ ба иқтисоди ин кишвар муҳим арзёбӣ кард.
Ба гуфтаи хонум Нуриддинова, ҳоло панҷ тарҳи сармоягузории хориҷӣ бо хазинаи 143 милллион доллари амрикоӣ ба Тоҷикистон пешниҳод шудааст, ки дар сурати пайвастани ин кишвар ба Протоколи Киото ин тарҳҳо ба мавриди иҷро гузошта хоҳанд шуд.
Дар назар аст ин маболиғ барои таҷдиди таҷҳизоти поксозии партовҳои корхонаи алюминии Тоҷикистон ва эҳдоси нерӯгоҳҳои кӯчаки обӣ масраф гардад.
Ҳамчунин, Маҳбуба Нуриддинова таъкид кард, ки аз соли 1990 то ба имрӯз мизони партови газҳои зараровар ба фазо ҳафт баробар коҳиш ёфта ва аз ин лиҳоз, пайвастани Тоҷикистон ба Протоколи Киото дар вазъи саноеъ ва тавсеъаи иқтисоди ин кишвар асари чандоне нахоҳад гузошт.
Вале раиси кумитаи парлумон дар умури иҷтимоъӣ, хонавода, беҳдошт ва муҳити зист натавонист намояндагони парлумонро нисбат ба аҳамияти ин санад мутақоъид созад.
Аз ҷумла, Шодӣ Шабдолов, намояндаи ҳизби коммунисти Тоҷикистон дар парлумон, ин суолро матраҳ кард, ки то чӣ андоза давлат махориҷи ношӣ аз пайвастан ба Протоколи Киоторо дар назар гирифтааст.
Ба эътиқоди оқои Шабдолов бахши аслии таҷҳизоти корхонаҳои санъатии Тоҷикистон кӯҳнаву фарсуда буда ва мизони қобили таваҷҷӯҳе аз газҳои зараровар аз ин таъсисот ба фазо ҷорӣ мешавад. Ва дар сурати тасвиби ин санад, давлати Тоҷикистон имкон нахоҳад дошт, дар кӯтоҳмуддат муқаррароти ин протоколро иҷро кунад.
Афзун бар ин, ба гуфтаи Шодӣ Шабдолов, ҷониби Ӯзбекистон муддаъист, ки газҳои ношӣ аз корхонаи алюминӣ манотиқи марзии ин кишвар бо Тоҷикистонро олуда сохта ва ба муҳити зисти маҳаллоте дар ҷануби Ӯзбекистон осеб задааст.
Намояндагони парлумон гуфтанд, ки дар сурати пайвастани Тоҷикистон ба Протоколи Киото нахуст Ӯзбекистон аз ин кишвар тақозо хоҳад кард, ки бар асоси бандҳои ин санад системи поксозии партовҳои корхонаи алюминиро таҷдид кунад.
Гуфта мешавад, барои ин кор хазинаи ҳангуфте лозим аст ва дар шароити феълӣ буҷаи Тоҷикистон имкони тахсиси ин маболиғро надорад.
“Ҳукми сангин” ва “додгоҳ кӯдаки ширхорро ба инобат нагирифт”. Вокунишҳо ба ҳукми зиндони Рухшона Ҳакимова
Нархи истифодаи нерӯи барқ дар Тоҷикистон боз гарон мешавад?
Раиси вилояти Суғд: Соли гузашта дар вилоят беш аз 100 корхонаи саноатӣ аз кор монд
"Тоҷик Эйр" парвоз аз Душанбе ба Раштро ҳам оғоз мекунад. Кай ва нархи чипта чанд аст?
Директори Маркази тадқиқоти стратегӣ гуфт, гузаштани Тоҷикистон ба “алифбои дигар айни ҳол матраҳ нест”
Размикори тоҷики ММА Беҳрӯз Зуҳуров ба арсаи ҷаҳонӣ бармегардад
Додгоҳи олии Тоҷикистон ҳукми гумонбарони "парвандаи табаддулот"-ро эълон кард
Хароҷоти буҷети Тоҷикистон барои пардохти қарзи давлатӣ хеле зиёд мешавад
Ҷон бохтани 17 кас дар пайи офатҳои табиӣ дар соли гузашта
Дар Русия барои интиқоли пул аз ҷониби муҳоҷирон боҷ ҷорӣ кардан мехоҳанд
Кулли ахбор
Авторизуйтесь, пожалуйста