Имрӯз, 1-уми май, Эмомалӣ Раҳмон, Президенти Тоҷикистон як қатор тағйироти кадрӣ анҷом дод. Дар ин бора сомонаи расмии Президенти Тоҷикистон хабар медиҳад.

Сафарзода Шарифхон Нураҳмад аз вазифаи раиси ноҳияи Варзоб озод ва муовини якуми раиси Вилояти Мухтори Кӯҳистони Бадахшон таъин карда шуд.

Шарифхон Сафарзода дар мансаби раиси ноҳияи Варзоб аз 25 июли соли 2022 фаъолият дошт.

Бо фармони дигари президент Дамонзода Хусрав Назаралӣ иҷрокунандаи вазифаи раиси ноҳияи Варзоб таъин карда шуд. То ин замон, Хусрав Дамонзода ба ҳайси муовини раиси ноҳияи Синои пойтахт фаъолият дошт.

Ҳамин тавр, Маҷидӣ Муҳтадӣ Хайрулло низ бо сабаби ба кори дигар гузаштан аз вазифаи раиси ноҳияи Ховалинги вилояти Хатлон озод карда шуд. Ба ҷойи ӯ Мирзозода Музаффар Бурҳон, ки ба ҳайси муовини якуми вазири кишоварзии Ҷумҳурии Тоҷикистон фаъолият дошт, бо қарори Ҳукумати Ҷумҳурии Тоҷикистон аз вазифа озод ва бо фармони президент иҷрокунандаи вазифаи раиси ноҳияи Ховалинги вилояти Хатлон таъин гардид.

Ҳоло маълум нест, ки Маҷидӣ Муҳтадӣ Хайрулло ба кадом вазифа таъин гардидааст.

Дар Telegram, Facebook, Instagram, OK ва ВК бо мо бимонед.