Владимир Путин, раисҷумҳури Русия дар дидор бо Эмомалӣ Раҳмон, президенти Тоҷикистон ба оила ва пайвандони Қобилҷон Алиев ҳамдардӣ кард ва ваъдаи таҳқиқи куштори ин навраси 10-солаи тоҷикро дод. Вохӯрии онҳо рӯзи 22 декабр дар шаҳри Санкт-Петербург дар доираи нишасти ғайрирасмии сарони кишварҳои узви ИДМ баргузор шуд.

Ба иттилои сомонаи Кремл, Владимир Путин таъкид дошт, ки амалҳои террористии ба ин монанд, бахусус нисбат ба кӯдакон аз доираи дарку фаҳмиши инсонӣ берун аст.

Раисҷумҳури Русия ба раисҷумҳури Тоҷикистон ва наздикону пайвандони Қобилҷон Алиев ҳамдардӣ баён карда, таъкид дошт, ки "чунин амалкардҳои террористӣ, бахусус нисбати кӯдакон аз доираи фаҳмиши инсонӣ берун аст" ва ӯро “ҳайратзада” кардааст.

“Гунаҳкорон ҷазо хоҳанд гирифт... Амали террористӣ нисбат ба кӯдакон нафратангез аст. Тафтишот то охир идома мекунад ва гунаҳкорон, агар якчанд нафар бошанд, бешубҳа, ба пуррагӣ ҷазо хоҳанд гирифт. Боз ҳам такрор мекунам, ин ҷиноят маро шигифтзада кард”, - изҳор дошт Владимир Путин.

“Хоҳиш мекунам, ки ҳамдардии амиқи маро ба оилаи навраси ҷонбохта расонед”, - таъкид дошт Путин.

 

Акс аз хадамоти матбуоти президенти ҶТ

Эмомалӣ Раҳмон дар навбати худ зарурати тафтиши воқеӣ ва беғаразонаи куштори Қобилҷони 10-сола ва ба ҷавобгарии ҷиноятии сангин кашидани ҳамаи гунаҳкоронро таъкид кард.

Ба иттилои хадамоти матбуоти президенти Тоҷикистон, зимни вохӯрӣ сарони давлатҳо тасмим гирифтанд, ки ба мақомоти дахлдори ҳарду ҷониб дастур диҳанд, ки ҳамкорӣ дар мубориза бо чунин амалҳои зӯроваронаро тақвият диҳанд ва дар ин самт чораҳои фаврӣ андешида шаванд.

Зикр кардан ба маврид аст, ки раисҷумҳурони ду кишвар бори аввал дар робита ба ин куштор мавқеи худро баён карданд. То ин лаҳза мақомоти Тоҷикистон ба тақдими нота ва ирсоли мактубу дархост аз мақомоти Русия талаби таҳқиқи беғаразу фаврии куштор шуда буд. Танҳо ВКХ-и Русия ба пайвандони Қобилҷони кушташуда ҳамдардӣ баён карда буд.

Ёдовар мешавем, ки Қобилҷон Алиев 16-уми декабр дар мактабе дар вилояти Маскав бар пояи “нафрати миллӣ” кушта шуд. Ҷасади ӯ рӯзи 18-уми декабр ба Тоҷикистон оварда шуда, ҳамон рӯз дар зодгоҳаш деҳаи Аҷами ноҳияи Шаҳринав ба хок супорида шуд.

Кумитаи тафтишоти Русия дар робита ба ин куштор як шаҳрванди 15-сола ва шаҳрванди Русияро боздошт карда, нисбат ба ӯ бо иттиҳоми куштор ва сӯиқасд ба куштор (моддаҳои 105 қисми 3, моддаи 30 қисми 2 Кодекси ҷиноии Русия) парванда боз карда, бо қарори додгоҳ, барои 2 моҳ ба ҳабси пешакӣ гирифт.

Ҳоло тафтишот идома дорад ва бар пояи моддаҳои эълонкардаи мақомоти Русия, ба муттаҳам аз 8 соли зиндон то ҳукми абаду қатл таҳдид мекунад.

Дар Telegram, Facebook ва Instagram бо мо бимонед.