Вазири мудофиаи Тоҷикистон Шералӣ Хайруллоев дар номаи расмӣ нисбати муроҷиати шаҳрванди ҷумҳурӣ Рустам Гулов дар бораи «облаваҳо» (дастгиру зӯран ба артиш сафарбар кардан), эътироф намуд, ки воқеъан ҳам дар ҷумҳурӣ чунин далелҳо ҷой доранд.

Дар ин бора Рустам Гулов дар блоги худ хабар медиҳад. Посухи расмиро аз вазир ӯ санаи 29-уми май гирифтааст. «Дар сархати чорум вазир ҷой доштани ин далелҳоро тасдиқ карда, онро «иҳотагирӣ» ном мебарад», - иброз доштааст Гулов.

Дар посухи вазири мудофиа, ки дар блог ҷой дода шудааст, Хайруллоев мушаххасан зикр мекунад, ки сабаби асосии дастгир ва зӯран ба хизмати ҳарбӣ фиристодани ҷавонон, саркашӣ намудани онҳо аз хизмати ҳарбӣ аст. «Ҳангоми саркашӣ намудан ва ҳозир нашудани даъватшаванда ба комиссияи даъват, кормандони шӯъбаи корҳои дохилӣ ӯҳдадоранд, онҳоро боздошт намоянд», - гуфтааст вазир.