Дар зарфи 5 моҳи соли ҷорӣ мизони ҷинояткорӣ дар вилояти Суғд 21,8% боло рафт.

Тавре ба ОИ «Азия-Плюс» аз Сарраёсати Агентиии омори назди президенти ҶТ дар вилояти Суғд хабар доданд, дар ин давра дар қаламрави минтақаи шимоли ҷумҳурӣ ҳудуди 2 ҳазор ҷиноят ба қайд гирифта шудааст, ки нисбат ба ҳамин давраи соли гузашта 357 ҳолат ё худ 21,8% бештар аст.

Ба иттилои манбаъ, дар муқоиса бо соли гузашта давоми моҳҳои январ-майи соли ҷорӣ шумори ҷиноятҳои вазнин дар вилоят 34 ҳолат ё худ 9,5% афзудааст, аз ҷумла дар ноҳияҳои Ғончиву Шаҳристон – 5,2 баробар, Ашт – 2,7 баробар ва шаҳри Истаравшан – 2,6 баробар.

Қобили зикр аст, ки шаби 2-юми июн дар ноҳияи Бобоҷон Гафуров як ҷинояти ниҳоят вазнину мудҳиш содир гардида, афроди номаълум як оилаи бутун, волидайн ва се нафар фарзандони онҳоро ба қатл расониданд.