Ҳайати Агентӣ бо роҳбарии Директори Агентии назорати маводи нашъаовари назди Президенти Ҷумҳурии Тоҷикистон генерал-лейтенанти милитсия Р. Назаров ба сафари хизматӣ ба шаҳрҳои  Екатеринбург - Тюмен - Омск – Новосибирск – Красноярски Федератсияи Русия сафар намуданд.

Бино ба иттилои шуъбаи робита бо ҷомеаи Агентии мазкур, мақсади сафар аз ташкили ҳамкориҳо дар бастани роҳҳои қочоқи маводи нашъаовар аз Ҷумҳурии Тоҷикистон ба Федератсияи Россия, табодули ахбори оперативӣ,  ҳамкории дуҷониба дар мубориза бо гурӯҳҳои мутташакили ҷиноӣ мебошад.

Дар доираи сафари худ бо роҳбарони маъмурияти вилоятҳо, Раёсатҳои  Хадамоти Федеролии  назорати маводи нашъаовари Россия, Вазорати корҳои дохилии ФР, Хадамоти Федеролии Иҷрои Ҷазои Россия, ки дар ин вилоятҳо фаъолият менамоянд, инчунин бо  фаъолони ҷамъияти тоҷикони ин вилоятҳо вохӯриҳо гузаронида мешавад.

Дар ҷараёни сафар ҳайати АНМН аз  Донишкадаи ҳуқуқшиносии Сибири Красноярск дидан менамоянд, ки дар он 20 нафар фарзандони кормандони Агентӣ ва ВКД ҶТ таҳсил доранд.