70%-и қисмҳои низомии Вазорати мудофиаи Тоҷикистон бо камераҳои мушоҳидаи видеойӣ муҷаҳҳазанд. Дар ин бора ба «Азия-Плюс» сардори маркази матбуоти Вазорати мудофиаи ҷумҳурӣ Фаридун Маҳмадалиев хабар дод.

Ба гуфтаи ӯ, бо қарори ҳукумати Тоҷикистон, тамоми муассисаҳои вазорат – сар аз дастгоҳи марказӣ то қисмҳои низомӣ то соли 2015 бояд бо камераҳои мушоҳидаи видеойӣ муҷаҳҳаз карда шаванд.

Маҳмадалиев қайд кард, ки камераҳо дар қаламрави қисмҳои низомӣ дар ҳама ҷо – даромадгоҳ, ҳавлӣ, ошхона, хобгоҳ, толори варзишӣ ва ғайр аз ин, дар деворҳои атрофи қисмҳои низомӣ насб гардидаанд, то ки тамоми қаламрави қисми ҳарбӣ таҳти мушоҳидаи доимӣ қарор дошта бошад.

Дар ҳамин ҳол, ӯ аз ҳисоби кадом воситаҳо ҷудо шудан ва ҳаҷми маблағи масрафмешуда барои насби камераҳои видеойиро мушаххасан нагуфт.

Хизматчиёни ҳарбӣ аллакай нақши камераҳои мушоҳидаи видеойиро мусбат арзёбӣ намуда, умедворанд, ки мавҷудияти онҳо ба аз байн рафтани падидаи бузургсолорӣ (дедовшина) дар артиш мусоидат мекунад.

«Баъди насби камераҳои мушоҳидаи видлеойӣ муносибат бо мо беҳтар шуд ва умуман чӣ будани «дедовшина» фаромӯш шуд», - гуфт дар суҳбат бо хабарнигори «Азия-Плюс» яке аз хизматчиёни нерӯҳои марзбонӣ.