Бинои Раёсати Вазорати корҳои дохилӣ дар шаҳри Душанбе (РВКД)-ро тахриб намуда, бо ҷои он эстакада бунёд мекунанд. Дар ин бора аз Сарраёсати меъморӣ ва шаҳрсозии пойтахт ба “Азия-Плюс” хабар доданд.
Ба гуфтаи манбаъ, сохтмони бинои нави ин ниҳод, дар майдони “Бофанда” –и пойтахт оғоз шудааст ва ҷараёни он 2-3 сол тӯл мекашад. Дар давраи пандемия, дар майдони “Бофанда” беморхонаи муваққатии сайёр, ки аз 120 “контейнер”-и ҷониби Ӯзбекистон иборат буд, ҷойгир мешуд.
Манбаи мо аз ироаи ҷузъиёти дигар худдорӣ кард, танҳо гуфт, дар ҷои бинои феълии РВКД дар Душанбе эстакада бунёд мешавад.
“Мақсад аз бунёди эстакада бартараф кардани ҷараёни тамбашавии мошинҳо ва баланд бардоштани иқтидори нақлиётии хатсайрҳо аст”, - афзуд ӯ.
Бояд гуфт, дар сурати бунёди эстакада ҳамаи иншооти наздик - биноҳои истиқоматӣ, Майдони “Ғалаба” ва “Танкаи ИС-2 (Иосиф Сталин)”, ки 35 сол пеш дар арафаи Рӯзи ғалаба - 9 май соли 1987 дар пойтахт, ҳамчун муҷассамаи ёдгорӣ, қомат афрохта буд, тахриб мешаванд.
Ёдовар мешавем, ки як манбаъ дар шаҳрдории Душанбе ҳанӯз соли 2019 ба “Азия-Плюс” гуфта буд, ки дар доираи татбиқи Нақшаи генералии пойтахт то соли 2030 ният доранд, дар Душанбе ҳудуди 20 эстакадаи нав бунёд кунанд.
Ӯ гуфта буд, ки аз ҷумла лоиҳаи бунёди гузаргоҳҳои се ва дуошёна дар маҳаллаҳои “Сирк”-и пойтахт, гардиш аз корхонаи нассоҷӣ ба сӯйи комбинати гӯшт, дар гардиши фурудгоҳ, “Масложиркомбинат”, сафорати ИМА дар Душанбе, микроноҳияи 102, дарвозаи ғарбии пойтахт, дар ҳудуди корхонаи семент, бозори «Корвон» амалӣ карда мешавад.
Ба таъкиди вай, ҳамаи лоиҳаҳо дар марҳалаи баррасӣ мебошанд ва дар сурати тасдиқ, онҳо аз ҳисоби буҷети шаҳр ва маблағҳои сармоягузорӣ сохта мешаванд.
То имрӯз дар шаҳри Душанбе ду эстакадаи сеошёна: дар минтақаи маъруф ба “Қарияи Боло” ва дар микрорайони 82 сохта шудааст.
Руcский