Субҳи имрӯз, 10 июн, ширкати ҳавопаймоии «Сомон Эйр» 25 нафар мактаббачагони мактаб-интернати ҷумҳуриявии низомаш махсуси беморони фалаҷ, воқеъ дар ноҳияи Ҳисорро барои табобат дар давраи истироҳатӣ ба беморхонаи физиоперативии ба номи А. Нурматови шаҳри Хуҷанд бурд.

Ба гуфтаи масъулини ширкати мазкур, ин иқдоми онҳо амали хайриявӣ буда, ҳарсола ин корро анҷом медиҳанд. Гуфта мешавад, ин ширкат сарпарастии мактаббачагони мактаб-интернати ҷумҳуриявии низомаш махсуси беморони фалаҷ, воқеъ дар ноҳияи Ҳисорро ба уҳда дошта, ҳамзамон таъмиру тармими бинои мактаб-интернетро анҷом медиҳад.

Абдуғаффор Маҳмадов, намояндаи мактаб-интернати ҷумҳуриявии низомаш махсуси беморони фалаҷ дар ноҳияи Ҳисор мегӯяд, тақрибан 7 сол инҷониб ширкат сарпарастии мактаб-интернатро ба уҳда дошта, ҳамасола кумакҳо мерасонад:

«Дар доираи ҳамин кумакҳо, имрӯз, 10 июн, ширкати «Сомон Эйр» 25 нафар хонандагони мактаб-интернатро барои табобат ба шаҳри Хуҷанд бурд. Интиқоли хонандагон ройгон буда, хароҷоти рафту омадро худи ширкат ба уҳда гирифтааст»,-мегӯяд номбурда.

Ҳамзамон гуфта мешавад, ширкати «Сомон Эйр» аз кишварҳои дигар барои табобати тарбиятгирандагони мактаб-интернат табибонро меорад. Хароҷоти рафтуомади табибон низ ба дӯши ин ширкат вогузошта шудааст.

Ҳамакнун дар назар аст, ки 25 хонандаи аллакай ба Хуҷанд расида, давоми як моҳ он ҷо ба табобат фаро гирифта шаванд.