Сарояндаи шинохтаи тоҷик Нигина Амонқулова рӯзи 27 апрел таҳти унвони “Фиребо” клип (намоҳанг)-и таронаи навашро нашр кард.

Дар сабти ин клип беш аз 40 нафар ситораҳои шоубизнеси тоҷик - сарояндагону оҳангсозон, рӯзноманигорону ҳунармандон иштирок кардаанд.

Нахустнамоиши клип рӯзи 27 апрел дар YouTube - шабакаи «Qiam Entertainment» баргузор шуд. Оҳанги тарона ба худи Нигина Амонқулова тааллуқ дошта, коргардони клип Меҳроби Мирзо мебошад.

“Фикри сабти клип - гирдиҳам овардани шахсони эҷодкори Тоҷикистон, бори дигар ёдрас кардани дӯстиву рафоқат ва омодагӣ ба дастгирии ҳамдигар аст, - гуфт ба “Азия-Плюс” муаллифи матни тарона Орзу Исоев. - Тамоми қисмати техникии клипро мутахассисони тоҷик омода карданд. Тавре маълум аст, аксари овозхонҳои мо клипҳояшонро дар берун аз ҳудуди кишвар - Дубай, Тошкнад ва дигар шаҳрҳо сабт мекунанд. Акнун мутахассисони мо нишон доданд, ки аз ҳамтоҳои хориҷии худ ҳеҷ камие надоранд”.

Ҳунарманди маъруфи тоҷик Моҳпайкар Ёрова, ки дар саҳнаҳои клип ҳузур дорад, ба “Азия-Плюс” изҳор дошт, ки ин фикр ба ӯ писанд омада, бо камоли майл розӣ шудааст, ки дар сабти клип иштирок кунад.

“Ба назарам, дар Тоҷикистон  ин гуна клип бори нахуст наворбардорӣ мешавад. Ҷараёни сабти он бароҳату гуворо сурат гирифт, зеро шахсоне ҷамъ шуданд, ки ҳар яке дар соҳаи худ соҳибкасбу варзида аст”, - гуфт ӯ.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.