Тибқи рӯйхати тасдиқкардаи Вазорати корҳои хориҷӣ, имрӯз аз шаҳри Маскав се парвоз ба самти Душанбе ва ҳамчунон як парвоз аз шаҳрҳои Санкт-Петербург, Екатеринбург ва Уфа ба Душанбе анҷом дода мешавад.

Бино ба иттилои Бахши хабарии Осиёи Марказӣ, мувофиқи ин ҷадвал ҳамчунон рӯзи 31-уми октябр низ се парвоз аз Макскав ва ҳамчунон як парвози дигар аз Красноярск ба Душанбе сурат мегирад. Тибқи ин ҷадвал парвозҳои чартерӣ то 31-уми октябр муайян шудаанд, аммо то ҳанӯз масъалаи аз сар гирифтани парвозҳои маъмулӣ миёни Тоҷикистон ва Русия маълум нест.

Сафорати Тоҷикистон дар Маскав мегӯяд, Тоҷикистон ҳанӯз моҳи июл омодагии худро ҷиҳати барқарор кардани паврвозҳои маъмулӣ ба мақомоти Русия изҳор дошта буд.

"Дар сурати омода шудани Русия, Тоҷикистон омода аст парвозҳоро барқарор кунад, вале ин ба вазъи эпидемиологӣ дар Русия ва тасмими мақомоти ин кишвар вобаста аст",-гуфтаанд дар сафорат.

Парвозҳои маъмулӣ миёни Тоҷикистон ва Русия аз 20-ум март инҷониб бинобар пандемияи короновирус қатъ шудаанд. Ба иттилои мақомот, дар ин давра тавассути парвозҳои чартерӣ ҳудуди 70 ҳазор шаҳрвандон аз Русия ба Тоҷикистон оварда шуданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.