Кормандони Кумитаи тафтишоти Русия дар вилояти Маскав зодаи Тоҷикистонро дар доираи парвандаи ҷиноӣ оид ба қаллобӣ ҳангоми дарёфти кумакпулӣ (субсидия) барои манзил (қисми 4, моддаи 159.2 КҶ ФР) боздошт карданд. Дар ин бора раёсати Кумитаи тафтишот дар вилояти Маскав хабар медиҳад.
“Гумонбаршуда ба қонуншиканӣ даст зада, ба маъмурияти ҳавзаи шаҳрии Митиши дар бораи даромади шавҳараш маълумоти бардурӯғ пешниҳод намуда, дидаву дониста онро чанд маротиба кам нишон додааст. Ғайр аз ин, ӯ аз дафтарчаи манзил маълумоти нодуруст пешниҳод кардааст, ки гӯё дар ҷои истиқоматаш 13 нафар, аз ҷумла бародараш бо ду кӯдаки ноболиғаш зиндагӣ мекунанд, ҳол он ки онҳо дар Ҷумҳурии Тоҷикистон зиндагӣ мекардаанд”, - гуфта мешавад дар хабар.
Дар раёсати Кумитаи тафтишот зикр кардаанд, ки “амалҳои ғайриқонунии гумонбаршуда ба дарёфти ғайриқонунии мақоми камбизоатӣ ва ниёзманд ба манзил барои оилаашон боис гардида, дар натиҷа ба онҳо гувоҳномаи ҳуқуқ ба гирифтани кумакпулӣ барои манзил ба маблағи беш аз 24 млн рубл барои харид ё сохтмони хона дар ҳудуди вилояти Маскав дода шудааст”.
Дар ҷараёни тафтишот кофтукову бозпурсӣ ва мусодираи ҳуҷҷатҳо, аз ҷумла телефонҳои гаронарзиш бо нархҳои 140 ва 120 ҳазор рубл сурат гирифтаанд, ки мақоми камбизоатии оиларо зери шубҳа мегузоранд.
Тибқи маълумоти парванда, боздоштшуда модари ҳафт фарзанд Таҳмина Самадова мебошад, ки ҳамроҳ бо шавҳараш Рамазон Раҳимов 13 январ гувоҳномаи манзилро барои харидории хона гирифтаанд. Ин гувоҳномаро роҳбари Митиши Юлия Купетская супурд. Ба гуфтаи ӯ, ин хонаводаи серфарзанд дар як хонаи якҳуҷрагӣ зиндагӣ мекунад.
Ин қарор боиси эътирози шадиди шабакаҳои иҷтимоӣ ва блогерон гардид. Тавре канали Telegram «Осторожно, новости» хабар медиҳад, онҳо изҳори норозигӣ карданд, ки шавҳари Самадова дар шабакаҳои иҷтимоӣ гуфтааст, ки «барои парчами Тоҷикистон ба ҳама кор ҳозир аст» (аммо барои парчами Русия не) ва мақомоти қудратиро танқид кардааст.
Дар байни мунтақидон Сергей Миронов ва гурӯҳи неонатсистии ДШРГ «Русич» низ буданд, ки оиларо “русиягиҳои азизи шаҳрвандиашонро ба туфайли ришвахорӣ дар ВКД гирифта” номиданд ва Юлия Купетская, роҳбари маъмурияти Митиширо дар мусоидат ба муҳоҷирон ва фасод айбдор карда, истеъфои ӯро талаб мекарданд.
Рӯзи 20 январ роҳбари Кумитаи тафтишоти Русия Александр Бастрикин талаб кард, ки дар бораи қазияи ҳуқуқвайронкунии манзил дар Митиши ҳисобот пешниҳод карда шавад ва парвандаи ҷиноӣ боз карда шуд.
Руcский