Мусобиқаи қоравии интихобии олимпии бокс аз сабаби авҷи коронавирус дар шаҳри Вуҳани Ҷумҳурии Мардумии Чин бекор карда шуд.

Дар изҳороти гурӯҳи махсуси Кумитаи байнулмилалии олимпӣ омадааст, ки дар ҳамкорӣ бо Кумитаи олимпии Чин ва шарикон макони нави баргузории мусобиқаро ҷустуҷӯ доранд. Он шояд дар дигар шаҳри Чин, ҳатто дар кишвари дигар баргузор шавад.

Бино ба иттилои Кумитаи миллии олимпии Тоҷикистон, мусобиқаи интихобии олимпии Осиё/Уқёнус оид ба бокс бояд 3-14 феврал дар шаҳри Вуҳани Чин доир мегашт.

Рӯзи қабл Конфедератсияи футболи Осиё низ бинобар сабаби паҳн шудани вирус, ки дар натиҷа 17 нафар ба ҳалокат расидаанд, макони баргузории мусобиқаи интихобии олимпии бонувонро аз шаҳри Вуҳан ба шаҳри Нанҷинг гузаронд.

Тибқи иттилои мақомоти Чин, феълан ба коронавирус сироят ёфтани 540 нафар ба қайд гирифта шудааст, ки ин шумора ҳар рӯз меафзояд. Ҳолати сироят ёфтани шаҳрвандон дар дигар шаҳрҳои Чин, ҳамчунин Тайланд, Кореяи Ҷанубӣ ва Ҷопон сабт шудааст. Ҳолати бақайдгирии сироятёфтагон дар Иёлоти Муттаҳидаи Амрико ва Мексика низ рӯй додааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.ДзенOK ва Google Новости бо мо бимонед.