Ҳайати Тоҷикистон дар нишасти вижаи Созмони Милали Муттаҳид оид ба Афғонистон дар Давҳаи Қатар, ки қарор аст имрӯз, 1-уми май, баргузор шавад, ширкат мекунад. Дар ин бора Шоҳин Самадӣ, сухангӯи Вазорати корҳои хориҷии Тоҷикистон ба “Азия-Плюс” хабар дод.

Аммо ӯ дар хусуси аъзои ҳайати кишвар тафсилот ироа накард.

Гуфта мешавад дар нишасти имрӯзаи СММ оид ба Афғонистон намояндагони 25 кишвари ҷаҳон ҳузур хоҳанд дошт.

Дар ҳамин ҳол, рӯзномаи  “8 субҳ” бо такя ба расонаҳои байналмилалӣ хабар медиҳад, ки ин нишаст ба таври пӯшида баргузор хоҳад шуд.

Ба иттилои манбаъ, исми ширкаткунандагони нишасти Давҳа ва макони двқиқи баргузории он то ҳол эълон нашудааст.

Бар асоси иттилои нашршуда, СММ қасд дорад намояндагони бархе аз кишварҳои марбут ба умури Афғонистонро гирди ҳам оварда, роҳҳои таъсиррасонӣ ба Толибонро баррасӣ кунад.

Ҳарчанд муовини дабири кулли СММ чанде пеш гуфта буд, ки дар ин нишаст роҳҳои хурди ба расмиятшиносии Толибон низ баррасӣ хоҳад шуд, аммо Ведант Пател, сухангӯи вазорати хориҷаи Амрико, ахиран гуфтааст, “ҳар навъ ба расмият шинохтани Толибон* комилан аз рӯи миз хориҷ аст.”

Ба иттилои рӯзнома, нишасти вижаи СММ оид ба Афғонистон дар ҳоле баргузор мешавад, ки панҷ қудрати ҷаҳонӣ, аъзои Шӯрои амнияти ин созмон, дар авохири ҳафтаи гузашта маҳдудиятҳои ҷорикардаи Толибон барои занон дар Афғонистонро маҳкум кардаанд.

*Дар Тоҷикистон гурӯҳи террористӣ эътироф шудааст

Ҳар он чи дар Афғонистон рух медиҳад, метавонед мустақиман дар сужаи мо - "Афғонистон" бихонед.

Дар Telegram, Facebook, Instagram, OK ва ВК бо мо бимонед.