Дидбони ҳуқуқи башари Сурия гуфтааст, аз замони оғози даргириҳои охир дар вилояти Сувайдои ин кишвар 594 нафар кушта шудаанд. Ин гурӯҳи нозир бар нақзи ҳуқуқи башар дар Сурия, ки дар Британияи Кабир мустақар аст, мегӯяд, аз рӯзи якшанбеи гузашта афзоиши якбораи хушунат ва кушторҳои бераҳмона дар ҷануби Сурия ва минтақаи Сувайдоро сабт кардааст.

Бар асоси омори пешниҳодкардаи ин созмон, дар 5 рӯзи гузашта дар ин минтақа 300 нафар аз дурузҳо кушта шудаанд, ки 146 нафари онҳо ҷангҷӯён ва 154 нафари дигар ғайринизомиён будаанд.

Дар ин муддат, ба гуфтаи манбаъ, 257 нерӯи амниятии ҳукуматӣ ва 18 аз қабилаҳои бодиянишин низ ба қатл расидаанд.

Муноқиша дар Сувайдо ибтидо миёни дурузҳо ва бодиянишинҳои суннимазҳаб оғоз шуда, баъдан бо дахолати нерӯҳои ҳукуматӣ авҷ гирифт ва дар ду рӯзи гузашта Исроил ҳам ба ин даргириҳо худро ҳамроҳ кард.

Дар ҳамин ҳол, Аҳмад Шаръ, раисҷумҳури муваққати Сурия, Исроилро дар талош барои тақсиму пора кардани Сурия муттаҳам кард ва ваъда дод, ки аз амнияти ақаллияти дурузҳои ин кишвар ҳимоят мекунад. Изҳороти Аҳмад Шаръ пас аз он садо дод, ки шаби чаҳоршанбе даргириҳои маргбор байни нерӯҳои ҳукуматӣ ва ҷангҷӯёни дуруз дар ҷануби Сурия бо миёнҷигарии Амрико ва кишврҳои арабӣ қатъ шуд.

Бо ин вуҷуд, рӯзи панҷшанбе пас аз изҳороти Аҳмад Шаръ гузоришҳо дар бораи задухӯрдҳои нав миёни қабилаҳои араби суннӣ ва ҷангҷӯёни дуруз дар Сувайда мунташир шуд.

Як фармондеҳи қабилаҳои бодиянишин ба хабаргузории “Ройтерз” гуфтааст, ки оташбас танҳо ба нерӯҳои ҳукуматӣ дахл дорад ва ба ҷангиёни бодиянишин, ки талош доранд нерӯҳои худро аз асорати дурузҳо раҳо кунанд, марбут нест.

 

Дар пайи задухӯрдҳо сокинони Сувайдо ба сӯи Даръо фирор мекунанд
Reuters

Рӯзи чаҳоршанбе Исроил бо баҳонаи ҳимоят аз дурузҳо ба мавқеъҳои нерӯҳои давлатии Сурия, аз ҷумла ба бинои Вазорати дифоъ дар маркази Димишқ, инчунин, ба наздикии кохи раёсатҷумҳурии Сурия ҳамла кард.

Дар пайи ҳамлаҳои Исроил ва миёнҷигарии Амрико, бисёре аз нерӯҳои давлатии Сурия аз минтақаи Сувайдо берун шуданд. Ин нерӯҳо барои қатъ кардани даргириҳои фирқаии маргбор дар вилояти дурузнишини Сувайдо фиристода шуда буданд.

Ақаллияти дурузҳои Сурия ба далели собиқаи шӯришии Аҳмад Шаръ ва фаъолияти қаблиаш дар гурӯҳҳои ифротӣ нисбати ӯ ва ҳукуматаш назари чандон мусбат надоранд.

Дурузҳо фирқае аз мазҳаби шиа буда, дар кишварҳои Сурия, Лубнон ва Исроил зиндагӣ мекунанд. Теъдоди онҳо дар Сурия 700 ҳазор нафар гуфта мешавад. Дар Исроил шумораи дурузҳо ба 150 000 нафар мерасад ва ба фарқ аз арабҳои фаластинӣ онҳо дар полису артиши Исроил хидмат мекунанд ва ҳатто дар ҷанги Исроил алайҳи Ғазза низ ширкат доранд. Баъзе аз дурузҳо дар Артиши Исроил соҳиби мансаби баланд ҳастанд.

Бенямин Нетаняҳу, нахуствазири Исроил бо баёни ин ки ин кишвар бо истифода аз зӯр ҳимоят аз ақаллияти дурузҳоро идома хоҳад дод, хостори таъсиси як минтақаи ғайринизомӣ дар ҷануби Димишқ шудааст.

 

Getty Images

Исроил ҳамчунин ба як гурӯҳи дурузҳо, ки ба Исроил барои аёдати хешовандонашон сафар карда буданд, рӯзи панҷшанбе иҷоза додааст, то ба манзили худ дар минтақаи Маҷдал Шамс дар бландиҳои Ҷӯлон (минтақае, ки дар пайи ҷанги шашрӯза Сурия аз сӯйи Исроил ишғол шудааст) баргарданд.

Дар ҳамин ҳол, Вазорати хориҷаи Амрико рӯзи панҷшанбе эълом кардааст, ки сиёсати ин кишвар дар қиболи Сурия тағйир наёфтааст ва дар баробари маҳкум кардани хушунатҳо дар Сувайдо, аз давлати Димишқ хостааст, гузоришҳо дар бораи бадрафтории нерӯҳои давлатиро таҳқиқ ва нафарони муттаҳамро муҷозот кунад.

Дар пайи суқути Башор Асад ва ба қудрат расидани Аҳмад Шаръ дар Сурия ҳукумати Амрико аз ӯ ҳимоят ва таҳримҳо алайҳи ин кишварро лағв кард.

Ба навиштаи “Ал-Ҷазира”, ҳоло ҳам дар минтақаи Сувайдо миёни гурӯҳҳои мусаллаҳи дуруз ва қабилаҳои бодиянишин даргириҳо давом доранд. Ин расона бо такя ба манбаъҳои худ навиштааст, ки Вазорати корҳои дохилии Сурия омодагӣ гирифтааст, ки барои поён додан ба ин муноқишаҳо ва ҳифзи амнияти шаҳрвандон дигарбора вориди Сувайдо шавад.

Дар Telegram, Facebook ва Instagram бо мо бимонед.